"Gazan Israel egiten ari den genozidioarekin amaitu behar da berehala"
Gernika-Palestina taldeak deituta, elkarretaratzea egin dute gaur arratsaldean Oiartzungo plazan. Okupazioarekin bukatzea eskatu dute, besteak beste.
Gernika-Palestina iniziatibak deituta, elkarretaratzea egin dute gaur arratsaldean Done Eztebe plazan. Euskal Herrian antolatu diren mobilizazio uholdearen tanta bat izan da Oiartzungoa.
“Aste hauetan Palestinan bizi den indarkeriak eragiten duen izugarrikeriaren erdian, antsietatea, ezintasuna, amorrua eta tristura bideratzen lagunduko diguten ekimenak bilatzen ditugu”, adierazi dute elkarretaratzea bukatzean.
Euskal Herrian —”Gernikaren errautsetatik loratu zen herrian”— “ehunka” mobilizaziotan elkartu direla adierazi dute, “transbertsalitate eta aniztasun zabalean”. Euskal gehiengo politiko eta sindikala kalera atera dela nabarmendu dute. “Hori da gure balorea”.
Hiru arrazoiengatik elkartu direla esan dute. Lehena, Israel Gazan egiten ari den “genozidioarekin” bukatu behar dela eskatu dute, baita irtenbide “justu eta demokratikoa” ere.
Bigarren arrazoia da Nazioarteko Zuzenbidean eta NBEren ebazpenen betearazte zorrotzean oinarritu behar dela konponbide hori. Eta hirugarrena, Israelen okupazioarekin bukatu eta Palestinaren autodeterminazio eskubidea “bermatu” behar dela.
“Justiziarik gabe ezin da bakerik egon. Sortu den indarkeria-zikloa, israeldarren eta palestinarren arteko arazoa modu baketsuan konpontzeko hamarkadetako aukera asegabeen eta egin gabekoen emaitza tragikoa da”, gaineratu dute.
Nazioarteari deia
Israelgo estatua nazioarteko erakundeei zein GKEei erakusten dien “mespretxua eta harrokeria” onartezintzat jo dituzte.
Horrez gain, nazioarteko eragileei dei egin diete, “genozidioaren konplize” ez izateko. “Nazioarteko komunitatearen erantzukizuna da bakea babestea, negoziaziorako eta elkarrizketarako baldintza mesedegarriak sortzea eta gatazkaren sugarrak ez haizatzea”, azaldu dute.
Munduko “liderrei” bakerako deia egitea eskatu diete, eta ez mendekuarena. “Genozidio honekin bukatzeko beren esku dagoen guztia egin dezaten interpelatzen ditugu”.
75 urtez luzatu den gatazkari bakea lortzeko “modu bakarra” honakoa dela esan dute: “Palestinako
herriak giza eskubideen, duintasunaren eta nazio eskubideen alde dituen bidezko nahiak betetzea da”.
Norberak bere esparrutik elkartasunerako eta konponbiderako deia egiten jarraitzea eskatu dute. “Sarraski hau gelditzeko eta Palestinari elkartasuna adierazteko mobilizazio guztiak beharrezkoak dira”.
