Gazako sarraskia gelditzeko eskatu dute pasaitarrek
Palestinako herria bizitzen ari den egoera salatzeko eta haiei elkartasuna adierazteko, hainbat herritar bildu dira udaletxearen aurrean. Gazan Israel egiten ari den genozidioarekin berehala bukatu behar dela eskatu dute.
Palestinako herria bizitzen ari den egoera salatzeko eta haiei elkartasuna adierazteko, Gernika-Palestina plataformak elkarretaratzeak deitu zituen atzoko 19:00etan Euskal Herriko herrietako udaletxeen atarietan. Gazako sarraskia gelditu! lelopean, hainbat herritar bildu ziren bart Pasaiako udaletxearen aurrean.
Bildutakoek irmo salatu zuten “Gazan Israel egiten ari den genozidioarekin” bukatu bar dela “berehala”, gatazka horri “konponbide justu eta demokratikoa” emateko. “Ezein erasok ez du justifikatzen Israel Palestinako herriari aplikatzen ari zaion zigor kolektiboa”, esan zuten.
Konponbide hori “Nazioarteko Zuzenbidean eta NBEren ebazpenen bateratze zorrotzean” oinarritu behar dela adierazi zuten. Horrez gain, “okupazioa bukatu eta Palestinaren autodeterminazio eskubidea” bermatu behar dela zehaztu zuten bertaratutakoek.
Justiziarik gabe bakerik egon ezin daitekeela nabarmendu zuten: “Sortu den indarkeria zikloa israeldarren eta palestinarren arteko arazoa modu baketsuan konpontzeko hamarkadetako aukera asegabeen eta egin gabekoen emaitza tragikoa da”.
Jarraitu zuten esanez “erabat onartezina” dela Israel GKE ezberdinei eta nazioarteko erakundeei azaltzen ari zaien “mespretxua eta harrokeria”. Era berean, nazioarteko eragileak “genozidio horren konplize” ezin direla izan nabarmendu zuten: “Nazioarteko komunitatearen erantzukizuna da bakea babestea, negoziaziorako eta elkarrizketarako baldintza mesedegarriak sortzea eta gatazkaren sugarrak ez haizatzea. Munduko liderrek bakerako deia egin behar dute eta ez mendekurako deia. Genozidio honekin bukatzeko beren esku dagoen guztia egin dezaten interpelatzen dugu”.
Azkenik, “75 urtez luzatu den gatazkan bakea lortzeko modu bakarra Palestinako herriak giza eskubideen, duintasunaren eta nazio eskubideen alde dituen bidezko nahiak” betetzea dela uste dute. Nork bere esparrutik “elkartasunerako eta konponbiderako deia” egiten jarraitzea “ezinbestekoa” dela adierazi zuten: “Sarraski hau gelditzeko eta Palestinari elkartasuna adierazteko mobilizazio guztiak beharrezkoak dira”.