Lehen sektoreko proiektuak diruz lagunduko dituzte aurten ere
Herriko ustiategiak sustatzeko 60.000 euroko diru-laguntza lerroa ireki du aurten ere Oiartzungo Udalak. Abenduaren 1era arte eska daiteke.
Oiartzungo Udalak lehen sektoreko proiektuentzako diru-laguntza lerroa zabaldu du beste urte batez. 60.000 eurokoa izango da partida.
Udalak azaldu duenez, elikadura burujabetzan aurrerapausoak ematea da haien helburua. Horretarako “ezinbestekoa” da lehenengo sektore “indartsua” izatea, eta herriko nekazari eta abeltzainak babestea.
2.000 eta 1.000 euro arteko laguntza ekonomikoa jasotzeko aukera izan dezake ekoizle bakoitzak, ustiapen motaren eta izandako gastuen arabera.
Azaroaren 11tik abenduaren 1era egongo da irekita eskaerak aurkezteko epea. Erregistro elektroniko bidez edo udaletxe arreta zerbitzuan egin beharko da eskaera. Oinarriak, eskaera orria eta gainontzeko informazioa Oiartzungo Udalaren webguneko Iragarki Taulako Dirulaguntzak atalean daude eskuragarri.
Zer ordainduko du?
2023ko urtarrilaren 1etik abenduaren 1era arte egindako gastuak ordaintzeko izango dira ekarpenak: inbertsio eta ustiategien hobekuntzak; Oiartzungo baserritarren lan baldintzak hobetzeko ekintzak; abandonatutako nekazal-lurretan jarduera berreskuratzeko lanak; nekazaritza makineria eta ekipoen erosketa; baratzezaintza eta lorezaintza intentsiborako instalakuntzak; berrikuntza teknologikora edo belaunaldien errelebora bideratutako aholkularitza azterketa lanak; ekoizpen ekologikoa bultzatzeko egitasmoak; albaitaritza zerbitzuen gastuak; nekazaritza erabilerarako ur gastuak edota abereen bazka eta pentsuen ordainketa, besteak beste.
