Gabonetan herriko txokoak modu "jasangarrian" apainduko dituzte
Argien ohitura beste batengatik aldatuko dute aurten: material jasangarriarekin egindako apaingarriak. Horiek sortzeko bi saio antolatu dituzte.
Olaia Lasa eta Agustin Lekuona zinegotziak, Abaraxka eta ikastetxeetako kideak eta herriko sortzaileak. Datorren hilabetean izango dira Gabonak, eta ohitura izan ohi da kalean argiak jartzea. Aurten horri buelta eman, eta ingurumenarekin errespetu handiagoarekin jokatzeko asmoa dutela jakinarazi du Oiartzungo Udalak.
Kaleak apaintzeko material “jasangarria” erabiliko dutela iragarri dute, eta hori sortzeko bi saio egingo dituztela, elkarlanean. Udalak, Abaraxka ludotekak eta herriko sortzaileek indarrak batuko dituzte horretarako.
Ekimena izan dutenek azaldu dituzte xehetasunak: “Sormena eta irudimena erabiliaz dekorazio originala, polita eta jasangarria sortu nahi dugu elkarlanean, argi gutxiago erabili eta egunez ere gabon giroaz gozatzeko”.
Abenduaren 15etik urtarrilaren 7ra Doneztebe plaza eta inguruko kaleak koloreztatzeko proposamena diseinatu dute herriko gazte sortzaileek. Material naturalak eta birziklagarriak erabiliko dituzte txokoak janzteko: adarrak, hostoak, morkotsak, oihal zatiak, sokak, artilea…
Bi saio, sortzeko
Apaingarriak elkarlanean sortuko dituzte; artistek pentsatu dituzten apaingarriak elkarlanean bildu eta osatu nahi dituzte orain herriko ikastetxeek eta eragileek zein udalak.
Datorren larunbatean, hilak 18, jarri dute lehenengo hitzordua. o9:30ean Done Eztebe plazan elkartuko dira inguruko lorategi eta basoetako materiala jasotzera joateko. Oiartzuar guztiak animatu dituzte materiala biltzera.
“Larunbatean bertan edo aurretik ere kuadrillan edo norbere kabuz mendira joaten direnek ere animatu nahi ditugu oiartzuarrak, ahalik eta material gehien jasotzeko”. Larunbatean bertan 12:30ean plazan pilatuko dute bildutako guztia.
Oiartzuarron arbola
Jarriko dituzten apaingarrien artean, egur xaflekin egindako arbola handi bat izango da. Herriko plaza nagusian kokatuko dute, eta etxeetan soberan dauden apaingarriekin bete nahi dute zuhaitza.
Deia egin diete oiartzuarrei: “Etxe askotan egoten dira dagoeneko erabiltzen ez diren bola eta apaingarriak. Datozen egunetan Abaraxka udal ludotekara eramateko eskatu nahi diegu herritarrei, hauek berrerabili eta guztion artean oiartzuarron arbola sortzeko”.
