Oiartzunera etorri berriei ongietorria egingo diete hilaren 26an
291 etorri dira Oiartzunera, eta harrera beroa egingo diete Abaraxkan izango den ekitaldi batean. Ondoren, Munduko Arrozak.
2015ean antolatu zuten lehen aldiz harrera ekitaldia, eta urtero errepikatu da. Oiartzuar berriei harrera egiteko ekitaldia antolatu dute hilaren 26rako (hurrengo igandea). Herrira 291 lagun iritsi dira azken hamabi hilabeteetan.
Ekitaldi hori Abaraxka ludotekan izango da, 11:00etan hasita. Otordutxo baten bueltan elkartuko dira Oiartzunera etorri berri diren herritarrak eta hemen lehendik bizi direnak, zaharrago zein gazteago. Bertako eta urrutik o jakiak dastatzeko aukera izango da.
2015ean hasi zen Oiartzungo Udala bizilagun berriei harrera egiten. Udaleko Euskara eta Gizarte Ongizateko Sailak eta Abaraxka ludoteka elkarlanean ari dira 26ko hitzordua prestatzen. Azken hilabeteetan Oiartzunen erroldatu direnei eskutitza bidali diete parte hartzeko gonbita eginez.
“Gure herria nolakoa den kontatzeko oiartzuarrak eta herriko eragileak ere animatu ditugu saiora, harrera askoz naturalagoa baita esperientziak lehen pertsonan kontatuta. Egin diezaiegun herriko bizilagun berriei guri egitea nahiko genukeen harrera!”, animatu dute antolatzaileek.
Ondoren Munduko Arrozak ekitaldiarekin gozatzeko aukera izango dute. Abarka GGKEk antolatu du, bigarren aldiz.
