UEMAren 'Egin nirekin euskaraz' kanpainarekin egin du bat Oiartzungo Udalak
Jatorria edo sustraiak beste herrialde batean dituzten euskaldunek gainontzekoekin euskaraz komunikatu nahi dute, aurreiritziak gaindituta.
UEMAk Egin nirekin ere euskaraz! kanpaina martxan jarri berri du. Sustraiak beste herrialde batzuetan dituzten euskaldunen eskaria da kanpaina; Oiartzungo Udalak bat egin du horrekin.
Izan ere, gainerako euskaldunek euskara ukatzen zieten beste herritarrei. “Euskarak kolore asko dituela eta azalaren kolorea askotarikoa izan arren herritar horiek guztiak euskaldunak direla gogoratu nahi du kanpainak”, adierazi dute.
Zerrendatu egin dituzte adibideak: “Euskaldunak dira Arlenys, Haider, Aimar, Aya, Nora, Sefora, Miruna, Randy, Ekhi, Manna, Anastasia, Andriy, Zunnurain, Lassana, Abdallah, Alaia, Rayan eta Leen, UEMAk egin duen Egin nirekin ere euskaraz! kanpainari aurpegia jarri dioten lagunak”.
Hainbat herrialdetatik datozela nabarmendu dute: “Senegalen, Dominikar Errepublikan, Saharan, Pakistanen, Ukrainan, Marokon, Ekuadorren eta Euskal Herrian jaio dira, besteak beste. Bizi, berriz, Ondarroan, Leitzan, Ibarran, Zestoan eta Zaldibian bizi dira, baina Oiartzunen eta gainerako udalerri euskaldunetan ere badira beste dozenaka Abdallah, Leen edota Arlenys, zorionez”.
Etxean hizkuntza ezberdinak jaso dituztela jakinarazi dute, baina guztiek ezagutzen dutela euskara, lehen, bigarren edo hirugarren hizkuntza moduan. “Guztiak euskaraz aritzen dira ikastetxeetan edo lagunartean”.
Jarraitu dutenez, “azalaren kolorearengatik, aurreiritziengatik edota auskalo zergatik”, gainontzeko euskaldunek erdaraz hitz egiten diete. “Eta ez zaie gustatzen”, argitu dute. “Badakigu euskara dela zubirik ederrena, eta euskara ukatzen diguten bakoitzean zubia ere ukatzen zaigu”, adierazi dute protagonistek.
Beraiekin ere euskaraz aritzeko gonbita egin diete gainerakoei. “Euskara ukatzen digutenean, bertakoa izatea eta sentitzea ere ukatzen digute, nahi gabe izan arren”.
