Greba orokor feministara deitu du Pasaiako Mugimendu Feministak
Greba egiteko premiaz aritu dira, "zaintza lanak ezin direlako ikusezin eta merkantilizatzen jarraitu". Hilaren 30a "egun garrantzitsua" izango dela diote.
Hilaren 30eko greba orokor feministaren atarian, Pasaiako Mugimendu Feministak argazki kolektiboa atera du gaur eguerdian. Hamarnaka lagunek egin dute bat Antxoko Biteri plazan egindako deialdiarekin. Argazkia atera ondoren, mugimenduko kideek osteguneko grebara deitu dituzte pasaitarrak, “zaintza lanak ezin direlako ikusezin eta merkantilizatzen jarraitu”.
Pandemiak zaintza “krisia agerian” utzi zuela esan dute lehenik, “aurpegi ugari dituen krisia”. Etxeko langileen esplotazioa eta haien baldintza “negargarriak” salatu nahi izan dituzte. “Sektorea desaraututa dago, langile migratu asko Atzerritartasun Legearen ondorioz diskriminazio egoeran daudelako. Horri guztiari gehitu behar zaizkio lanaren prekarizazioa eta langabezia, pentsio baxuak, etxebizitzaren, gasolinaren eta oinarrizko beharren garestitzea. Horrek guztiak sakontzen du krisi sozialean”, esan dute.
Zaintza sostengatzen dutenak “langile klaseko emakumeak” izaten jarraitzen dutela esan dute, eta ondorioz, “denboren eta baliabideen pobrezia pilatzen jarraitzen” dutela emakumeek.
Zaintzarako “eskubide kolektibo baten” alde egin dute Pasaiako feministek, “pertsona guztiak bizitza osoan zehar zaintzak askatasun, duintasun eta konpromiso baldintzetan emateko eta jasotzeko duten eskubidearen alde. Zenbat, nola eta nor zaindu nahi dugun erabakitzeko gaitasunaz ari gara eta era berean, zaintzaren auziari arduraz begiratzeaz eta erantzukizunak hartzeaz ari gara”. Zaintza “erantzukizun” izan dadin borrokatuko dute, “eta ez negozio”. Gizartea “eraldatzeko” neurriak bultzatu behar direla erantsi dute, eta “denon bizitzak bizigarriagoak zian daitezen” zaintzak negozio izateari utzi behar diola.
Datorren osteguna “egun garrantzitsua” izango dela esan dute azkenik, eta horregatik herritar guztiei dei egin diete “borrokan parte hartzera: heldu, gazte, emakume, eta, bai, baita gizonak ere, dagokizuen ardura hartu eta egun horretan greban egon zaitezten garrantzitsua da”.
7:30ean jarri dute osteguneko hitzordua, gosaldu eta kotxe karabana eta piketeak egingo dituzte. 12:30ean manifestazioa egingo dute eta ondoren, bazkaria izango da Biteri plazan. Arratsaldean berriz, Errenteria-Oreretara joango dira pasaitarrak, bertan “indar erakustaldi erraldoia” egiteko.
