'Kristalezko begi bat'-ekin zita, gaur arratsaldean
Oiartzungo Irakurketa Taldeak Miren Agur Meaberen eleberria izango dute hizpide gaur arratsaldean. Abendurako, Joan Mari Irigoienen 'Babilonia'.
Oiartzungo Irakurketa Taldea gaur arratsaldean elkartuko da, hilabete honi dagokion liburua iruzkintzeko: Miren Agur Meaberen Kristalezko begi bat eleberria izango dute hizpide.
Manuel Lekuona bibliotekan jarri dute hitzordua, 20:00etan.
Abendurako etxeko lana, berriz, aurtengo maiatzean hil den Joan Mari Irigoienen Babilonia liburua izango da. Abenduaren 19an elkartuko dira. Honakoa da liburuaren premisa:
Babilonia baserriko Trinido eta Feliziano anaien arteko gorabehera eta liskarrak kontatzen ditu, XIX. mendearen erdialdean, azkenean familiaren hondamena ekarri duena. Eleberria familia-saga bat da, baserrian girotua (hain zuzen ere, Babilonia baserrian bizi dira eleberriko protagonistak), eta errealismo magikoaren zertzeladak dituena. Garaiko xehetasun historiko ugari ere ematen ditu, bereziki Karlistaldien inguruan.