Kirola egiten duten gizon eta andreen artean ere, "arrakala"
Kirol arloan ikuspegi feministatik egindako diagnosiaren emaitzak aurkeztu dituzte. Emandako pausoei berriak batu nahi dizkie udalak.
Nora Velez del Burgo eta Edorta Fernandez zinegotziak, diagnosiaren aurkezpenean. Kirol arloan diagnosia egin Oiartzungo Udalak, ikuspegi feministarekin, eta hortik ateratako ondorioak aukeztu dituzte publikoki.
Landetxeko auditorioan elkartu ziren kirol eragileen ordezkariak zein beste hainbat herritar ere. Nora Velez del Burgo Feminismo zinegotziak eta Edorta Fernandez Kirol sailekoak eman zuten haien berri.
Udalarentzat ematen duen kirol zerbitzua garrantzitsua dela nabarmendu zuten ordezkari politikoek. Horren adibide batzuk jarri zituzten: kirol instalazioak kudeatzen dituelako, Eskola Kirolarekin praktika sustatzen duelako, edo kirol elkarteak diruz laguntzen dituelako.
Horregatik, ikuspegi feministadun azterketa egin dute, indarguneak eta ahulguneak non dauden detektatu eta “aurrerapauso berriak” emateko asmoarekin.
Arrakalak kirol praktikan
Diagnosian hainbat esparru aztertu dituzte. Honakoak dira: federatutako kirolean aritzen den gizon eta emakume kopuru eta egiten duten kirol mota, klubetako zuzendaritzen osaera, eskola kirolako partaideak, kiroldegiko bazkideak, ikastaroetako abonatuak, espazioen erabilera eta Udaleko Kirol Sailetik egiten diren egitasmo eta hitzarmenak.
Udaletik kanpoko aditu batek egindako ikerketa kuantitatiboa jasotzen du azterketak. Ez da, ordea, egin duten lan bakarra. Zazpi hilabeteko prozesuan galdetegi, talde dinamika eta elkarrizketetan parte hartu duten 31 eragile, teknikari eta herritarrekin osatu dute argazkia.
Ezberdintasun “nabarmenak” azaleratu direla jakinarazi dute, kopuruei dagokienez, “bereziki” kirol federatuan eta Eskolan Kirolan.
Emakume federatuen kopurua ez da laurdenera iristen (%24 dira): 980tik 240 besterik ez dira. Gizonek dozena bat kirol federatutan parte hartzen dute, eta, emakumeek, zortzitan.
Gainera, herriko bost klubetako zuzendaritzetako kideen %19 besterik ez da emakumea. Eskola Kirolan ere bistakoa da aldea: 275 haurrek egiten dute eskola kirola herrian. Horietatik 107 dira neskak (%39) eta 168 mutilak (%61).
Arrakala horien faktoreak zeintzuk diren ikertzen saiatu dira, halaber, eta horiek iraultzeko proposamenak jaso dituzte.
Ekintza plana
Genero ikuspegia txertatzeko udalak egindako lanak fruituak eman dituela nabarmendu dute azterketan. Zerrendatu dituzte: kontratazioak egiterakoan berdintasun klausulak txertatzea, diru-laguntzak ematerakoan genero ikuspegia kontuan izatea eta udaleko kirol eta feminismo sailen arteko elkarlana, besteak beste.
Egindako aurrerapausoetan sakontze aldera, ahulguneak zuzentzeko hainbat neurri hartuko dituztela iragarri du udalak. Herriko kirol elkarteekin egingo du lanketa, kirolean ere emakume eta gizonen parekidetasuna lortzeko elkarlana “ezinbestekoa” dela iritzita.
