Adierazpen instituzionala onartu dute, Azaroaren 25aren harira
Emakumeen prebentziorako eta erreparaziorako zerbitzuak eskaini nahi ditu Oiartzungo Udalak. Herritarrei dei egin diete larunbateko mobilizazioetan parte har dezaten.
Janire Mitxelena EAJko zinegotzia, Garazi Urdanpilleta EH Bildukoa eta Joana Mendiburu alkatea. Emakumeenganako Indarkeriaren Aurkako Nazioarteko Egunaren harira, adierazpen instituzionala onartu dute Oiartzungo EH Bildu eta EAJ udal taldeek. Indarkeria matxista guztiak gaitzetsi eta indarkeria horren prebentzioan eta erreparazioan lan egiten jarraitzeko konpromisoa adierazi dute Udaletik.
Herritarrak deitu dituzte hilaren 25erako, mugimendu feministak deitutako mobilizazioan bat egin dezaten.
Azaroak 25
Emakumearen Indarkeriaren Aurkako Nazioarteko Eguna da azaroak 25. Emakumeak forma anitzetan jasa dezake indarkeria: fisikoa, psikologikoa, sexuala, ekonomikoa, etab. Indarkeria horren oinarria gizon eta emakumeen arteko gizarteratze edo sozializazio prozesu ez parekidea dela azpimarratu dute, hau da, parekidetasun eza.
Horregatik garrantzizkoa iruditzen zaie gizarte-balio parekideak eta sexu-hezkuntza transmititzea; bai eskolan, familian zein jendartean. Berdinzalea ez den jendarte batean hezteak, “indarkeria horiek ikusteko gaiztasuna sor dezakeelako”. “Kasu askotan, gainera, indarkeria jasan izana salatzen duten biktimei ez zaie sinisten eta horrek, indarkeria instituzional eta soziala izateaz gain, eragotzi egiten du esku-hartze goiztiarra eta erreparatzailea.”
Oiartzungo Udalak adierazi du indarkeria matxista lehen lerroko arazoa dela, eta eskura dituen estrategia eta mekanismo guztiak sustatuko ditu prebentziorako eta erreparaziorako:
- Oiartzungo emakumeentzat aholkularitza juridikoa eskainiko dute.
- Oiartzungo Topalekuan neska gazteen ahalduntze espazio bat martxan jarriko dute.
- Indarkeria matxistari aurre egiteko Oarsoaldeko Autolaguntza zerbitzuarekin jarraituko dute.
- Indarkeriari aurre egiten dieten nerabeentzako arreta psikologikoko zerbitzu espezifikoarekin jarraituko dute.
- Udalerriko adingabeekin hezkuntza-prozesuak indartu eta hezkuntza ez-formalean eragingo dute: Topalekua martxan jarrita eta Abaraxka Ludotekarekin elkarlanean.
- Berdinsarean sartzeko eskaera egingo dute.
