Planek euskararen erabileran duten eragina aztertuko dute
Hizkuntzaren normalizazioan plan pribatu zein publikoak aztertu ahal izango dira. Euskara sustatzeko tresna izango dela dio udalak.
Aiako Harria Gaztelumendi, Hizkuntza Normalizaziorako zinegotzia. Ordenantza berria arautu du Oiartzungo Udalak, aurreikusitako plan eta proiektuek euskararen erabileran izan dezaketen eragina aztertu ahal izateko.
Horrela, proiektuak onartzeko prozeduretan zein baimen-emateetan egoera soziolinguistikoan izan deakeen inpaktua ebaluatuko dute. Modu horretan, euskararen erabileran kalterik sortzen ez dela ziurtatu nahiko dute, eta kalterik balekarke, zuzentzeko neurriak hartzeko.
Lurralde-antolaketa, euskararentzako “berebizikoa”
Oiartzungo Udalak nabarmendu duenez, lurralde-antolaketak hizkuntza-normalizazioan duen eraginea “berebizikoa” da. “Norbanakoak euskalduntzeaz gain, espazioak euskalduntzea ere ezinbestekoa da euskararen normalizaziorako”, adierazi du udalak.
Beraien ustez, eragin handiagoa dute euskararen normalizazioan lurralde-antolaketaren esparruan hartu diren erabakiek hizkuntza-politikakoek baino.
“Horregatik”, jarraitu du udalak, “hainbat proiektu berrik herriko trafikoan, ekonomian, azpiegituretan, naturaguneetan eta beste hainbat arlotan izan dezaketen eragina neurtzeko egiten den moduan, Eragin Linguistikoaren Ebaluazioa (ELE) ere egingo du aurrerantzean Udalak, hizkuntzaren bilakaeran izango duen inpaktua aztertzeko”.
Sustapenerako tresna
Ordenantza berria euskara sustatzeko “tresna” izango dela ziurtatu du udalak. Aiako Harria Gaztelumendi Hizkuntza Normalizaziorako Saileko zinegotziaren arabera, araudia sortu dute euskararen sustapenari “kalterik ez egiteko”. “Hizkuntza batek, biziko bada, bera nagusi den lur eremuak behar ditu, arnasguneak behar ditu. Bere funtzio guztiak mugarik gabe, askatasunez, bete eta garatzeko lekuak behar ditu. Eta espazio hauek zaintzeko ezinbestekoa da egoera soziolinguistikoan eragin dezaketen faktoreak aztertu eta neurriak hartzea”.
Honako plan eta proiektuek izan dezaketen eragina neurtuko dute, beraz: hiri-antolamenduko plan orokorrak; etxebizitza promozio berriak; industrialdeak; merkataritza guneak; turismo planak; zerbitzu ekipamenduak edota aisialdirako espazio berriak egitea.
ELE batzordea
Plan eta proiektuen eragin linguistikoa ebaluatzeko ardura izango duen ELE batzordea sortu du Oiartzungo Udalak. Hizkuntza-inpaktuaren gaineko erabakiak hartuko ditu batzorde horrek.
Aurreikusita dagoen plan edo proiektua garatzen hasi aurretik, organo sustatzaileari euskararentzat mesedegarriak diren funtsezko alderdiak eta hartu beharreko neurriak zein diren zehaztuko du taldeak.
Jakinarazi dutenez, Hizkuntza Normalizaziorako zinegotziak, sail horretako teknikariak, idazkariak eta ebaluatzen den egitasmoaren inguruko arloko udal teknikariak osatuko dute batzordea, besteak beste.
