Auzolan arrakastatsua, urmael bat eta tximeletentzako oasi bat sortuz
Igandean auzolana izan zuten lezoarrek. Hainbat azalpen jaso, urmaelean azken ukituak eman eta Altamirako oasia sortu zuten, besteak beste.
Igandean Lezoko institutuak antolatutako auzolanean eguraldia lagun izan zuten. Giro ederra sortu zutela adierazi dute antolatzaileek, 90 pertsona inguru bertaratu ziren. Auzolanaren helburua urmael bat eta tximeletentzako oasi bat egitea zen. Horretarako, lezoar guztiei zabaldu zieten gonbita, elkarrekin ingurumen eta hezkuntza gunea sortuz. Iaz arrakastatsua izan zen, eta aurten ere hala izan omen da.
Aranzadi Zientzia Elkarteko Ion Garinen eta Neikerreko, nekazal ikerketa eta garapenerako euskal erakundeko, Aitor Cevidanes adituen eskutik, egunari hasiera eman zioten. Lezoar parte hartzaile guztiek gaiaren inguruko azalpenak jasotzeko aukera izan zuten lanari ekin aurretik. Hala ere, antolatzaileek azaldu dute ostiralean Dbh 1. eta Dbh 2. mailako ikasleek lan handia aurreratu zutela auzolaneko kideak igandean urmaelera heldu aurretik. Jarraian, beste azalpen bat jaso zuten. Oraingoan, Zerynthia elkartearekin eskutik, tximeleten oasiaren inguruan jardun zuten eta Altamirako oasia sortu zuten.
Bestalde, taldeka hainbat zeregin burutu zituzten, besteak beste: fruta-arbolen landaketak, baratzaren txukunketa eta txikienekin; loreontzian landaketak. Gainera, Dbh 4. mailako ikasleek, pertsona ugari bildu zirela aprobetxatuta, ikasbidairako postua ipini zuten eguna musikarekin girotuz eta mokadutxoak eskaintzen: tortillak, bizkotxoak eta Carmen jatetxeko salda beroa.
Eguna bazkalorduan amaitu zuten, denek elkarrekin Altzate auzo elkartean bazkaltzen. Institututik eskerrak eman nahi dizkiete Zubitxo guraso elkarteari, Altzate auzo elkarteari, Lezoko Udalari eta Eusko Jaurlaritzako Ekonomia Garapen Jasangarritasun eta Ingurumen Sailari.
