Oiartzun indarkeria matxistatik salbu ez dela gogorarazi dute A25ean
Oiartzungo Feministen Asanbladak deituta, elkarretaratzea eta performancea egin dute plazan. Aurten hamabi kasu izan dira herrian.
Larunbatean indarkeria matxistaren kontrako eguna izan zen. Beste urte batez, Oiartzungo feministak kalera atera ziren, indarkeria mota hori salatzera. Elkarretaratzea egin zuten Done Eztebe plazan, baita antzerki performatibo bat ere.
“Haserre”, “nazkatuta”, “sutan” eta “amorratuta” daudela adierazi zuten, beste urte batez kalera atera behar izan dutelako. “2023ko urtarriletik, lau emakume eta ume bat izan dira erailak Euskal Herrian. Oiartzunen, berriz, dozena bat indarkeria egoera erregistratu dira epe honetan”, nabarmendu zuten. Hamabi kasu gutxienez, horietako asko erregistratu gabe geratzen direlako.
Euskal Herriko Mugimendu Feministaren ibilbide eta borrokari esker, gizartean aldaketak eman direla uste dute. Aldaketa horiek, baina, “azalekoak” direla uste dute. “Sistema kapitalista, heteropatriarkal, kolonial eta arrazistak bere horretan jarraitzen du”.
“Plano juridiko politikoan, soizoekonomikoan eta kulturalean eman beharreko aldaketak modu artikulatu batean ulertu behar ditugu”, gaineratu dute. Indarkeria matxistarekin bukatzeko estrategiak “artikulatua” izan behar duela aldarrikatu dute, eta aldaketak “plano guztietan” exijitu dituzte.
“Izan ere”, jarraitu dute, “badakigu egitura aldatzeak ahalbidetu dezakeela aldaketa kultural oso bat. Era berean, aldaketa kultural erradikal bat emateak ekar dezake egitura bera aldatzeko presio egitea”.
Mugimendu feministaren iritziz, eskuin muturraren gorakadak zein mugimendu erreakzionarioen diskurtsoak “egiturazko ulerkera” desmuntatu nahi dute. “Diskurtso horiek existitzeak berak indarkeria sortzen du gugan, emakume, trans eta bollerongan”.
Indarkeria mota horrek “hamaika forma” dituela ohartarazi dute, baina beti gorputz berberetan aplikatzen dela. “Indarkeria matxista sostengatzen duen sistema berberak sortzen ditu gure gorputzek pairatzen dituzten bestelako indarkeriak ere. Prekarietatea, soldata arrakala, lan baldintza onartezinak, ikusezin diren eta ordaindu gabeko zaintza lanak, pentsio miserableak… Eta indarkeria horiek guztiek ere gure gorputzetan eragiten dute”.
Horregatik, “kaleak hartu” eta “antolatzen jarraitzeko” arrazoiak “soberan” dituztela jakinarazi dute. “Beste urtebetez ozen diogu autodefentsa feministaz armatuta gaudela eta sistema hau irauli arte ez dugula amore emango. Gure arteko aliantzak sortzen, mantentzen eta indartzen jarraituko dugu”.
Feminismoetatik proposamen integralak egiten jarraitzeko “anbizioak” ez duela mugarik zehaztu dute. Larunbatean bezala, datorren ostegunean kalera aterako direla iragarri dute, greba deialdiari jarraituta. “Zaintza zerbitzu publikoen pribatizazioa ere indarkeria da”.
Euskal Herria feminista egingo dutela berretsi zuten, sistema “iraulita” eta “gorputzekin egiturak hautsiz”.
