Herriaren aurrean jarriko da gaur Patri Urkizu
‘Eskribu galduen bila’ liburua aurkeztuko du lezoarren aurrean 19:00etan, udaletxeko areto nagusian. Sortzailearen autobiografia eta kultur kritikak jasota daude argitalpenean, besteak beste.
Patri Urkizu. Patri Urkizu gaur herritarren aurrean jarriko da. Askotan egina du ariketa hori. Gaurkoa, beharbada, esanahi berezikoa izango da harentzat. Lezoarrak egin duen lan berrienaren gaineko azalpenak emango dizkie herrikideei, 19:00etan, udaletxeko areto nagusian. Eskribu galduen bila. Autobiografia eta kultur kritikak liburua aurkeztuko du. Izenburuan euskarriaren nondik norakoak garbi agertzen dira, 600 bat orrialdeko sormen lana da.
Urkizuren eta harekin batera aurkezpenean izango direnen azalpen hitzek irudiak izango dituzte lagun gaurko agerraldi publikoan, proiekzio bidez. 1946an jaiotako lezoarraren bizitzako hainbat pasarte daude jasota argazki horietan, aldi berean, Lezoko azken urteetako historia hobeto ulertzeko baliagarri izan daitezkeenak.
Izan ere, frankismoaren ondorengo lehen alkate demokratikoa izan zen Urkizu 1978tik 1983ra arte. «Patrik, bere alkate lanetan, garbi zuen herritarren alkate baino gehiago, haien ordezkaria zela. Bere gertutasuna eta apaltasuna nabarmenduko nituzke. Patrik egindako lana guretzako ispilu da», adierazi du Mikel Arrutik, Lezoko alkateak. Alkate izateaz gainera, idazle emankorra eta irakasle ere izandakoa da lezoarra.
Eskribu galduen bila. Autobiografia eta kultur kritikak ez da bakarrik Urkizuren bizitzaren eta lanaren berrikuspena. Bertako edukia estu doa lotuta herriarekin, Lezoko euskara, kultura, izaera eta ohiturekin. Pista gehiago eman baino, hobe izango da gaurko agerraldira hurbiltzea, Urkizuren hitz gozoen bitartez errazago izango delako lan horren mamia ezagutzea.
