Lehen postuan tinko jarraitzen dute areto futbolekoek
Tolosako Eskolapioak-Herrikide arerio gogorraren kontra gol batengatik nagusitu dira oiartzuarrak. Futboleko talde nagusiek, kale.
Areto futboleko talde nagusiak urrats sendoak egiten jarraitzen du. Ostiralean Tolosako Eskolapioak-Herrikide taldearen bisita jaso zuen Elorsoron.
Lehen zatian, jokoa nahiko orekatua izan zen, baina oiartzuarrak aurreratu ziren 15. minutuan. Bigarren zatiaren hasieran sartu zuten bigarrena, baina tolosarrek ez zuten amore eman eta aldea murriztea lortu zuten partida bukatzeko bi minutu falta zirenean. Arerio gogorra zirela erakutsi zuten, azkeneraino.
Suspense pixka bat jarri zioten norgehiagokari, baina oiartzuarren atezainak egindako geldiketa batek garaipena eman zien etxekoei. Oiartzuarrek lehenengo postuan jarraitzen dute, sendo.
Bigarren taldearen partidan ez zen gol festarik egon, Zaldibiako Resti pilotalekuan jokatutako partidan. Lehen zatian aukera dezente sortu arren, ez zen golik egon. Atsedenaldiaren bueltan etorri ziren partidako biak, talde bakoitzak bat sartuta. Adostasuna markagailuan, eta Miren Tabernak sailkapeneko bigarren postuan jarraitzen du bigarren itzuliko lehen jardunaldia bukatuta.
Futbolean, ezer onik ez
Futboleko talde nagusiek ez dute punturik lortu. Mutilek etxean jokatu zuten, igande eguerdian. Nahiko parekatuta hasi ziren bi taldeak, baina aldageletara joan aurretik gola jaso zuten oiartzuarrek, akats baten erruz.
Bigarren zatian ere antzeko joan ziren gauzak: Eibarrek bigarren gola sartu zuen oiartzuarren beste akats bat aprobetxatuta, eta partidak ez zuen ezer gehiagorako eman.
Nesken taldeak, berriz, irteera luzea izan zuen. Valladolideraino joan ziren, Parquesolen kontra jokatzera. Pucelarrek punteria hobea izan zuten, eta poste eta langaren artean bota zituzten hiru jaurtiketak sareetara joan ziren. Gol bakarra sartu zuten oiartzuarrek, nahiz eta aukerak sortu zituzten.
Hirugarren postuan jarraitzen du Oiartzunek, orain Añorgarekin berdinduta. Hala ere, aurretik daude, averagea eskuratu zutelako pasa den astean.
Emakumeen 3. RFEF Maila
- Parquesol — Oiartzun: 3-1.
Gizonezkoen Ohorezko Erregional Maila
- Oiartzun — Eibar: 0-2.
Emakumeen Euskal Liga
- Oiartzun B — Añorga B: 0-0.
Gizonen Lehen Erregionala. Kopa M-1.
- Oiartzun B — Usurbil B: 1-4.
Emakumeen Ohorezko Erregional Maila
- Oiartzun C — Intxaurdi: 1-7.
Mutilen Gazte Mailako Euskal Liga
- Oiartzun — Danok Bat: 1-1.
Mutilen Gazte Mailako Gorengo Maila
- Oiartzun B — Real Union B: 2-1.
Mutilen Gazte Mailako Lehen Maila
- Oiartzun C — Allerru: 5-1.
ARETO FUTBOLA
Gizonen Gipuzkoako Lehen Maila
- Oiartzun — Eskolapioak-Herrikide: 2-1.
Gizonen Gipuzkoako Bigarren Maila
- Ausa Zaldibi — Miren Taberna OKE: 1-1.
