Inauteriengatik, trafiko mozketak Antxo, Donibane eta San Pedron
Larunbatean zenbait mozketa izango direla aurreratu du Pasaiako Udaltzaingoak.
Larunbatean (hilak 10) herritarrek kolorez apainduko dituzte Antxo, Donibane eta San Pedroko kaleak, inauteriak ospatuko baitituzte hiru barrutietako bizilagunek. Festak eta horren barruko zenbait ekitaldik trafikoan eragina izango dutela aurreratu du Udaltzaingoak. Hala, honako aldaketak izango dira:
Donibanen, Lezo Bide kalea 10:00etatik aurrera itxiko dute, egun osoz. Hortaz, autobusaren geltokia Meipiko biribilgunearen ondoan izango da. Donibane kalera eta Bizkaia plazara sartzeko Larrabide Errepidea, San Roke kalea eta Juan XXIII kaletik sartu beharko dira herritarrak. Ateratzeko, berriz, Bordalaborda kaletik jo beharko da.
Antxon, 18:30etik aurrera, ohiko desfilea egingo dute, honako ibilbidearekin: Ibaiondotik abiatuko dira Hamarretxetara, Blas de Lezo, Zumakalarregi eta Biteri Plazatik pasata.
San Pedron, Herriko Plaza eta Passaman alargunaren kalea egun osoz itxiko dutela jakinarazi du Udaltzaingoak. 19:00etan abiatuko da kalejira eta ondorioz, Arraunlari kalea itxiko dute, zirkulazioa bi noranzko itsaslabarretik desbideratuz.
Informazio gehiago jaso nahi dutenek 943 00 43 00 telefono zenbakira deitu dezakete.
