500 oiartzuarrek baliatu dute KirolTxartela Mugiment beste udalerrietan
Iazko otsailean sartu zen Oiartzungo Udala sarean, eta ordutik hilero 40 bat lagun joan dira beste kiroldegietara.
Pasaiako Udal Kiroldegia da erabil daitekeen 99 kiroldegietako bat. Oiartzungo Udala iazko otsailean sartu zen KirolTxartela Mugiment sarean. Ordutik, Elorsoro kiroldegiko bazkideek bere txartela erabili ahal izan dute Araba, Bizkai eta Gipuzkoako beste 98 udalerritako kirol instalazioetan. Tartean daude Oarsoaldekoak, Donostiakoak, Bilbokoak edo Gasteizkoak.
Elorsoroko 345 bazkidek eskatu dute sare honetan sartzeko aukera. Horri esker, 504 oiartzuar joan dira beste herrietako kirol guneak erabiltzera, inongo kosturik gabe.
40 erabilera hilero
Proiektuan hainbat arrazoirengatik sartu zen udala. Gogorarazi dituzte zeintzuk diren bilatzen zituzten helburuak: “Ariketa fisikoa sustatzea, kirol-espazioetarako sarbidea erraztea eta kirol-eskaintza handitzea. Lanagatik, ikasketengatik edo dena delakoagatik beste udalerriren batean dauden Oiartzungo bazkideek bertako kiroldegiak doan erabiltzeko aukera emateko”.
Bazkide bakoitzak nahi adina alditan erabili dezake txartel birtuala eta batez beste 40 oiartzuarrek erabiltzen dute hilero, udalak emandako datuen arabera. Honakoak izan dira erabiltzaile kopuruak, atzekoz aurrera:
- Urtarrila (2024): 68.
- Abendua (2023): 43.
- Azaroa: 54.
- Urria: 45.
- Iraila: 43.
- Abuztua: 16.
- Uztaila: 14.
- Ekaina: 39.
- Maiatza: 63.
- Apirila: 29.
- Martxoa: 56.
- Otsaila: 34.
Sakelakorako aplikazioa
Beste kiroldegiak erabili ahal izateko, mugikorrean KirolTxartela Mugiment aplikazioa deskargatu eta erabiltzailearen datuak sartu behar dira.
Beste udalerriko kiroldegira joatean, sarreran aplikazioko txartel birtuala eta nortasun agiria besterik ez dira erakutsi behar. Aplikazioan bertan ikusi daiteke beste herrietako zein kirol instalazio eta zerbitzu erabili daitekeen eta zein ordutegitan. Informazio hori haien webgunean ere kontsulta daiteke.
