Udal kirol instalakuntzak kudeatuko ditu Donibane Eskubaloiak
Larrabide kiroldegia eta Donibane zein Trintxerpeko gimnasioak kudeatuko ditu datozen urteetan. Klubak "ilusioz" hartu du "erronka garrantzitsu hau".
Donibane Eskubaloi taldeak kudeatuko ditu Pasaiako udal kirol instalakuntzak aurrerantzean, hala jakinarazi berri du klubak. Joan den astelehenetik (hilak 1) BPXport enpresa ordezkatzen hasi da eskubaloi taldea, enpresa horrek kudeatu baititu azken 8 urteetan instalazioak. Zehazki, Donibaneko Larrabide kiroldegia eta Donibane zein Trintxerpeko gimnasioak kudeatuko ditu eskubaloi taldeak. Urtero berrituko dute kontratua eta gehienez lau urtez luzatu daiteke. Pasaiako Udalak egindako lehiaketa publikoan aurkeztu den hautagaitza bakarra izan da.
Klubak “ilusioz” hartu du “erronka garrantzitsu hau”. “Instalakuntzetan erreforma garrantzitsuak egiteko dagoen baliabide faltagatik, hauen egoera hobetzean zentratuko ditugu esfortzuak, duinagoak eta erosoagoak izan daitezen”, diote klubeko iturriek.
Kluba, erabiltzaile gisa, “instalakuntzen abandonua pairatzen” ari zela erantsi dute klubetik, “denboran luzatzen ziren konponketekin, garbiketa faltarekin, errepikakorrak ziren jardueren eskaintzarekin eta sektorearen errealitateari egokitu gabeko jarduerekin”. Horretarako, langileak subrogatu dituztela jakinarazi dute, eta horri esker hobekuntzak izango dituztela. Izan ere, 2023ko lan hitzarmena indarrean sartuko da orain, 2014tik aktualizatu ez den hura ordezkatuko duena. Horrez gain, instalakuntzak garbitzen eta mantentzen aritzen diren langileen lanaldia ere luzatuko dutela jakinarazi du taldeak, eta datorren urterako “ikastaroen eskaintza zabalagoa” izango dela, etekin ekonomotik harago, erabiltzaileen beharrak asetzea izango baitute helburu kudeatzaile berriek.
Larrabide kiroldegia berreskuratzea “ezinbestekoa” dela diote, “gure etxea delako eta Pasaiako kirol instalakuntza bakarra delako, gure zainketa behar duena”.
Gimnasioetan, aldiz, erabiltzaileek “tratu pertsonalizatua” jaso dezatela nahi dute, “haien interesak eta ohiturak ezagutuz materialak eta jarduerak egokitzeko”. Garbiketak indartzeko apustua ere egingo dute, baita eskaintza handitzekoa.
Azkenik, erabiltzaileei “pazientzia” eskatu die klubak, aldaketa prozesurako eta adaptaziorako aste batzuk beharko dituztelako. “Emaitzak progresiboki ikusiko dira, eta bereziki udaren ondoren”.