Uretan zein lehorrean, denetik eskainiko du hirugarren Pasaia Itsas Festibalak
Aurtengoa "jaialdi soil bat baino gehiago" izango dela aurreratu dute antolatzaileek, egitarau zabal eta oparoa prestatu dute. Maiatzaren 9tik 12ra ehundik gora ontzi porturatuko dira Pasaian.
Datorren maiatzaren 9tik 12ra, beste urte batez, ontzigintza tradizionalaren nazioarteko agertoki eta hiriburu izango da Pasaia. Dena prest dute hirugarren edizio honetarako antolatzaileek, gaur aurkeztu dute egitarau osoa Albaola Itsas Kultur Faktorian. Bertan, besteak beste, Teo Alberro alkatea, Albaolako komunikazio zuzendari Enara Novillo, Oninart enpresako proiektu buru Imanol Perotxena eta Txileko ontzigile Hugo Almonacid izan dira, herrialde hau baita aurtengo gonbidatu berezia. Gaurko aurkezpena, gainera, Albaolan ontzigile txiletarra haren aitarekin batera eraikitzen ari den belaontzi tradizionalaren aurrean egin dute.
Aurtengoa “jaialdi soil bat baino gehiago” izango dela aurreratu dute, “guztiontzako hezkuntza eta kultura esperientzia bat, gure sustraiekin konektatzeko eta itsasoak gure bizitzetan duen garrantziaz ikasteko”. Egitarauari erreparatuta, denetik izango da aurten ere: musika, dantza, erakusketa, gastronomia, erakustaldiak… Novilloren arabera, programazioa “itsas giro bikaina sortzera” bideratuta dago, “uretan zein lehorrean jarduerak eginez”.
Alkateak hartu du hitza Novilloren ondoren. Lankidetza eta parte hartzea nabarmendu ditu lehenik: “Parte hartzaile pasaitarrak, inguruko beste asko, internazionalak, berriak, eta hasiera-hasieratik jaialdi honetan parte hartzen dutenak. Eskerrik asko aurreko ehunka egunetan lau egunetan bildutako jaialdi hau errealitate bihurtzeko lanean aritu zareten guztioi: elkarteak, antolatzaileak, laguntzaileak… Eskerrik asko hondar ale bakoitzeko. Zati eta ekarpen horiek guztiek aurrera egiteko aukera eman digute. Eta, esan ohi denez, itsas jaialdi hau zati guztien batura baino askoz gehiago da”, esan du.
Ontzigile txiletarrak azaldu du Albaolan eraikitzen ari diren belaontzia festibalean uretaratuko dutela, hilaren 10ean hain zuzen, 19:00etan, Albaolan. Festibala heldu arte aita-semeak elkarrekin lanean ikusteko aukera izango dute faktoriara gerturatzen diren bisitariek. “Aitak eta biok 9 egun daramatzagu Txileko belaontzi tradizional bat eraikitzen. Chiloé artxipelagoko itsas ondareko ontzi tipikoa da, baina egokitu egin dugu nabigazio erakargarria lortzeko. Ontzi honek salgaiak garraiatzeko ontzi tradizional baten oinarria mantentzen du, orain estutu egin dugu, nabigatzea maitatzen duten pertsonen interesari eutsi eta, egungo zuntzezko ontzien pare jartzeko. Horixe da nire helburua, itsas ingeniari eta nire jaioterriko, Calbucoko, ontzigile tradizionalen laugarren belaunaldiaren ordezkari gisa”.
Egitaraua
Badiara iritsiko diren ontziei erreparatuz, aurten 111tik gora barku helduko dira, mundu osotik etorritakoak (izen emateak zabalik jarraitzen du). Belaz zein arraunean helduko dira guzti horiek maiatzaren 9an, 18:00etatik aurrera. Lotura honetan kontsulta daitezke ontziak.
Perotxenak lehorrean izango diren emanaldien gaineko xehetasunak eman ditu, “makina bat” jarduera izango direla aurreratu du. Kontzertuak San Pedroko lonja plazan eta Donibaneko Bizkaia plazan izango dira. “Argi izan dugu itsasoan gertatzen denaren osagarri izan behar zuela. Horregatik, kontzertuei dagokienez, hainbat aldagai aztertu dira, hala nola tokikoa erakustea, nazioarteko proiekzioa, bisitarien profila, herrialde gonbidatua eta itsasoarekin zerikusia duten herrialdeetako artistak”, esan du. Azaldu duenez, Ana Tijoux artista franko-txiletarra izango da aurtengo kartel buru, Perotxearen hitzetan, “garai guztietako rap abeslari onena” dena. Tijouxez gain, zenbait kontzertu nabarmendu nahi izan ditu: Anna Colomenarena, Tapia eta Leturiarena edota Txileko Calle Mamborena. Hemen kontzertuak eta egitarau osoa kontsulta daitezke.
Bi barrutietan egiten ari diren obra handiak dela eta, Antxo eta Trintxerpen ez dira ekitaldi gehiegirik egingo. Antxon, Molinao itsasadarrean hain zuzen, Denboraren tunelean izeneko bertso saio berezia egingo dute.
Goizane Albarez diputatuak ezin izan du gaurko aurkezpenera joan, baina halere, bere mezua helarazi nahi izan du: “Jaialdi honek behin eta berriz erakutsi du posible dela ikusleen interesa eta jakin mina piztea itsasoari lotutako kulturarekiko eta tradizioekiko. Harro gaude gure itsas sustraiak ospatzen dituen eta gure ondarearen kontserbazioa eta zabalkundea sustatzen dituen ekitaldi baten parte garelako”, esan du.