Pontikako aparkalekuetarako behin behineko zerrenda, argitaratuta
Onartutako eskaeren behin behineko zerrenda argitaratu dute, eta onartu ez direnen kasuan, zuzenketak aurkezteko 10 eguneko epea izango da.
Otsailean eskaerak egiteko epea zabaldu ostean, Pontikako aparkalekuetarako onartutako eskaeren behin behineko zerrenda argitaratu du Errenteriako Udalak.
Eraikinak autoak aparkatzeko 180 toki ireki izango ditu, eta beste 6 motorrentzako. Autoentzako plazetatik 66 eta motorrentzako 6ak lau urterako alokairu bidez erabiltzeko izango dira; aldiz, beste 31 automobil plaza 50 urterako emakida bidezko aparkalekurako izango dira.
Onartu ez diren eskaeren kasuan, zuzenketak aurkezteko 10 eguneko epea izango dute eskaera horiek aurkeztu zituzten pertsonek. Gero, aurkeztutako alegazioak aztertu ostean, behin betiko zerrenda onartuko du udalak, eta zerrenda hori erabiliko dute onuradunak aukeratzeko egingo den zozketa publikoan.
50 urteko emakidan egongo diren 31 plazetarako 79 pertsonek eman dute izena, eta alokairuzko 66 plazetarako, berriz, 190ek.