Antxoberfest feria, bertan behera
Hurrengo asteburuan egitekoa zen garagardoaren festa bertan behera uztea erabaki dute antolatzaileek. "Erantzukizunagatik" hartu dute erabakia: "Ezin dugu onartu kanpoko borondateek Antxoberfesteko irudi eta lan guztiak desitxuratzea".
Hurrengo asteburuan ez da garagardo azokarik egingo Antxon, Antxobefest bertan behera uztea erabaki berri baitute antolatzaileek. Ohar batean adierazi dutenez, “erantzukizunagatik, zuhurtasunagatik” hartu dute erabakia: “Ezin dugu onartu kanpoko borondateek Antxoberfesteko irudi eta lan guztiak desitxuratzea. Ezin dugu azokaren oinarrietako bat ziurtatu: giro ona eta harmonia ferian”. Hortaz, aurten ez da azokarik egingo maiatzaren 9tik 11era, egun horietan ez behintzat.
Antolatzaileek nabarmendu dute azoka bat baino gehiago dela Antxoberfest, “herritik eta herriarentzat” egindako festa dela, boluntario guztien lanari esker aurrera ateratzen dena, “beti irribarre batekin, beti gogo onez”. Feria erabat autofinantzatua eta altruista dela gogorarazi dute, eta Antxoberfestek herrian “eragina” duela.
Antolatzaileek sare sozialen bidez eman dute erabakiaren berri. Haien komunikatua ikusteko klik egin hemen.