Iñigo Gurrutxaga eta Ainhoa Arruti izan dira Landarbaso Traileko garaileak
Urtero giro ezin hobea sortzen da Liztorretan lasterketaren aitzakian; ibilbidean zehar zale asko izan dira lasterkariak animatzen. Euriaren faltan, beroari eta hezetasunari aurre egin behar izan diote lasterkariek.
Goizeko 10:00etan puntu-puntuan irten dira IV. Landarbaso Trailen parte hartu duten 250 korrikalariak. Listorretako piknik-gunea izan da urtero lez lasterketaren abiapuntua eta 18km eta 900m-ko desnibela gainditu ondoren, gune berean helmugaratu dira. Urdaburu Mendizale Taldeak antolatzen du.
Aste honetan izandako euriteen ondorioz lokaztutako bideetan barrena egin behar izan dute aurrera. Gaurko egunean ordea, eguzkia izan dute lagun. Alde horretatik “oso pozik” agertu da Unai Esnal antolatzailea, eguraldiak beren plangintza asko baldintzatzen baitu. Baina eguraldi honekin “dena ondo” ateratzen dela ziurtatu du. Gakoa, honakoa: “Ondo ateratzen diren gauzak errepikatzea eta mantentzea”.
Euriak errespetatu dituen arren, lasterkariek ez dute proba mendean hartzeko eguraldi aproposena izan. Izan ere, eguraldi ona bai, baina “hezetasunarekin beroa” egiten duela adierazi du Esnalek. Horri aurre egiteko hainbat hornidura puntu izan dituzte bidean zehar indarberritzeko beharrezko lehengaiekin. 18km-ko luzera du Landarbaso Trailek, mendiko lasterketa bat izateko ez da oso luzea, baina ibilbidea “gogorra” dela aitortu du antolatzaileak.
Urtero-urtero giro ezin hobea sortzen da Listorretan lasterketaren aitzakian. Ibilbidean zehar zale asko eta asko gerturatzen dira lasterkariak animatzera. Esnalen ustez horrek egiten du, besteak beste, lasterketa hau berezi: “Jende asko etortzen da lasterketa ikustera eta horrek giroa ematen dio lasterketari”.
Aurtengo edizioa nahiko herrikoia izan da. Hasiera batean Euskal Selekzioko bi partaidek eman zuten izena, baina azkenean selekzioak deituta beste lasterketa batean parte hartu behar izan dute. Horrek aukerak zabaldu dituela kontatu du Esnalek. Azkenean, duela bi edizio irabazi zituen berberak irabazi du aurtengoa: Iñigo Gurrutxagak. Esnal: “Guretzako berezia da. Ez da lasterketa profesional bat, horregatik gu pozik gaude herrian geratzen bada eta aurrean doazenak herrikoak eta lagunak badira”.
Hona hemen lehen hiru sailkatuak, herriko lehen sailkatuak eta Urdaburu Mendizale Taldeko lehen sailkatuak:
Gizonak
- 1. Iñigo Gurrutxaga Arruti, Donostia 1:30:16
- 2. Mattin Odriozola Ibarguren, Oiartzun 1:32:16
- 3. Oier Arraztio Mansilla, Errenteria-Orereta 1:33:44
Emakumeak
- 1. Ainhoa Arruti Loyarte, Urnieta 1:53:14
- 2. Nerea Amilibia Arruti, Zarautz 1:54:19
- 3. Intza mitxelena Ugalde, Oiartzun 1:56:37
Herriko lehen sailkatua
- 1. Oier Arraztio Mansilla, Errenteria-Orereta 1:33:44
- 1. Amaiur Iglesias Insausti, Errenteria-Orereta 2:06:59
Urdaburu elkarteko lehena
- 1. Oier Arraztio Mansilla, Errenteria-Orereta 1:33:44
- 1. Udane Alfonso Ibarguren, Errenteria-Orereta 2:07:03
