Itsasotik heldu da ontzigintza tradizionalaren festa handia
Tamaina eta tankera guztietako dozenaka itsasontzik hasiera eman diote gaur hirugarren Pasaia Itsas Festibalari. Ontzien baimenarekin, batelerak eta Txile izango dira protagonista handiak igandera bitarte.
18:00etan hasi dira iristen ontziak. Tamaina eta tankera guztietako dozenaka eta dozenaka itsasontzik Pasaiako badia txiki utzi dute gaur. Nola bestela, itsasotik heldu da Pasaia Itsas Festibalaren hirugarren ekitaldia. Igandera bitarte ontzigintza tradizionalaren munduko agertoki izango da Pasaia.
Iragarrita zegoen bezala, eguraldia lagun izan dute bertaratu direnek. Mundu osotik etorritako ontzi txiki, ertain eta handiek eskainitako ikuskizun ederraz gozatu dute, kanoi eta guzti iritsi dira handienak. Zientoka pasaitar eta bisitarik San Pedro eta Donibaneko kale eta kai bazterrak bete dituzte.
Ontziak izango dira protagonista nagusiak, baina ez bakarrak. Askotariko ekitaldi eta ekintzak antolatu baitituzte datozen egunetarako Pasaiako Udalak eta Albaola Itsas Kultur Faktoriak. Ontzien baimenarekin, Txile eta Pasaiako Batelerek ere protagonismo handia izango dute egunotan. Txile da aurtengo ohorezko gonbidatua, hango itsas ondarea, musika, gastronomia eta kultura ezagutzeko denetik izango da. Batelerak, aldiz, alde batetik bestera ikusteko aukera izango da, bai uretan, eta baita lehorrean ere. Haien presentzia ekitaldi askotan izango da.
Gaur etzi eta biharko egitaraua lotura honetan kontsulta daiteke osorik. Joan den asteko astekarian, HITZAk festibalari buruzko gehigarri berezia egin zuen. Beheko estekan ikus daiteke osorik.
Pasaia Itsas Festibalaren HITZAren gehigarria (PDF artxiboa da).
HITZAko Garazi Agirresarobe eta Imanol Saiz San Pedron eta Donibanen izan dira jaialdiaren hasieran, eta zenbait irudi jaso dituzte bertan, ondorengoak:
