Iritsi da itsas ondarearen jaialdia, Pasaia Itsas Festibala
18:00etan, dozenaka ontzik Pasaiako badia bere egingo dute. Milaka bisitari espero dira lehorrean. Txile eta Batelerak, izen handi jaialdia bitartean.
Iritsi da eguna. Gaur hasiko da III. Pasaia Itsas Festibala. Itsasoko kultur ondare tradizionalaren munduko topagune izango da badia. Itsaso usaina dute berez udalerriko kaleek, baina horri, itsasoak historian herriari eman diona oroitarazteko grina erantsi behar zaio. Antolakuntzaren buru Albaola Itsas Kultur Faktoria eta Pasaiako Udala izan dira, hainbat laguntzaile eta babeslerekin. Milaka bisitari espero dira herrian gaurtik, igandera arte.
18:00ak da ordua. Orduan hasiko dira badiara sartzen festibalean izango direla baieztatu duten dozenaka eta dozenaka ontzi tradizional eta historiadunak. Txikiak, ertainak eta handiak. Sekulako ikuskizuna izan da aurreko bi edizioetan horiek denak herrira itsasotik sartzen ikustea, eta gaurkoan ere hala izango da. Ordu horretarako 19 bat gradu eta eguzkia iragarri dituzte eguraldi iragarpenek, ezin hobe. Horren aurretik (17:30ean, San Pedron) eta ondoren (19:30ean, Donibanen) Mogumbo Brass Band taldeak kaleak girotuko ditu.
Gaurko hasieraren ondoren, bihar, etzi eta igandean itsasokoak eta lehorrekoak izango dira jarduerak. Asko eta asko dira. Baina aurtengo festibalari izaera bi arlok emango diote: batetik, Txile eta hango itsas ondarea izango da ohorezko gonbidatua, eta bestetik, Bateleren figura aitortzeko parada izanen da, haien presentzia ekitaldi askotan izango baita.
Hasi baino lehen, jada arrakasta. Izan ere, jaialdian zehar bisita daitezkeen ontzietarako jada ez da sarrerarik gelditzen joan den astetik. Bi ontzik ere zeharkaldiak eskainiko dituzte; horien txartelak ere ‘sold out’. Aita Mari erreskate ontzia bisitatzekoak ere, denak salduta.
Joan den asteko astekarian, HITZAk festibalari buruzko orri bereziak egin zituen. Beheko estekan klik egin, eta hori osotasunean ikusteko aukera izanen da. Gainera, hedabide honek itsas jaialdiaren jarraipena egingo du, albiste, argazki bilduma eta bideo bidez.
Pasaia Itsas Festibalaren HITZAren gehigarria (PDF artxiboa da).
