Hirugarrena ere, "esperientzia ahaztezina"
Pasaiako Udalak eta Albaola Itsas Kultur Faktoriak atzo itxitako Pasaia Itsas Festibalaren gaineko balorazioa egin dute. Bisitari kopuruari dagokionez, "arrakastatsua" izan dela diote.
Danborrada hotsekin itxi zuten atzo Pasaia Itsas Festibalaren hirugarren ekitaldia. Atzo bukatu zuten itsas ondarearekin lotutako festa handia, ekintza eta ekitaldiz betetako lau egun luzeren ondoren. Hirugarren hau ere, bisitari kopuruari dagokionez, “arrakastatsua” izan dela ondorioztatu dute udalak eta Albaola Itsas Kultur Faktoriak. Bide batez eskerrak eman dizkiete “edizio hau esperientzia ahaztezin bihurtu duten ontzi eta pertsona guztiei”.
Jaialdiaren bukaera irudikatzeko itsas danborrada berezia egin zuten hamarka lagunek atzo arratsaldean, San Pedrotik Trintxerpera. Donibanen, berriz, Anakrusa konpainiak herritarrak dantzan jarri zituen, itxiera ekitaldi biribila eskainiz.
Aurtengoa bukatu berritan, antolatzaileak dagoeneko hurrengo ediziora begira jarri dira: “Itsasoa eta haizea lagun baditugu, Pasaiako uretan ikusiko dugu elkar 2026an”, esan dute.
Jarraian, larunbat eta igandeko zenbait irudi:
