Berritasunekin datoz aurtengo Meipiko Jaiak
Alkate txikiak izango dira lehen aldiz aurten, eta Joaquin Azpillaga 'Txintxo'-ri omenaldi berezia egingo diote. Lurraldebusek zerbitzuak indartuko ditu asteburuan.
Iazko jaietan ateratako irudi bat. Meipiko auzotarrak festarako prest dira, bi egun besterik ez dira falta Meipiko Jaietarako. Aurtengo jaiak berritasunez beterik datozela iragarri du Meipiko Jai Batzordeak.
Batetik, aurten estreinakoz alkate txikiak izango dira, haiek arduratuko dira txupinazoa botatzeaz. Haurrek egindako marrazkietan oinarrituta, zozketa bat egin dute, eta ondorengoak izan dira onuradunak, haiek botako dute suziria: Iara del Valle Ferreirok eta Naroa Torres Martinek.
Bestetik, asteburu honetan Joaquin Azpillaga ‘Txintxo’ omenduko dutela jakinarazi du jai batzordeak. Arraunari eskaini dio Azpillagak bizitzako zati handi bat, bereziki gazteekin lan eginez. Jai Batzordekoen arabera, pertsona “adeitsua, txantxazalea eta umore onekoa” da, eta “auzoa egiten” laguntzen duen pertsona horietakoa dela.
Aurtengo egitarauaren helburua “auzoko txoko guztietara iristea” izango da, baita “adin guztietako jendearengana ere”. Behean osorik ikus daiteke egitaraua.
Autobus gehiago
Aldundiak, Teo Alberro alkatearen eskaerari erantzunez, Lurraldebuseko zerbitzuak indartuko ditu Meipiko Jaiak direla eta. Hala, ostiraletik larunbaterako gauean E71 linearen gaueko zerbitzua indartuko dute eta Donibaneko sarrerako biribilgunetik 23:00etan, 00:00etan, 01:00etan eta behar izanez gero, 2:00etan ere aterako da autobusa. Donostiatik aldiz, 23:30ean, 00:30ean eta 2:30ean aterako da.
“Aurrekoetan egin dugun bezala, esfortzu horiek zerbitzua hobetzeko aukera emateaz gain, Pasaiara jai hauetaz gozatzera joaten diren pertsonek garraio publikoko zerbitzu eroso, seguru eta irisgarria izatea ahalbidetzen digutela uste dugu”, esan du Azahara Dominguez diputatuak.
Meipiko jaien egitaraua:
Ostirala (hilak 24):
- 17:30: Haurrentzako jolasak eta tailerrak, Kuadrillategiren eskutik.
- 18:45: Elektrobuiaka elektrotxaragaren emanaldia Meipin, Kuadrillategik antolatuta.
- 19:00: Pasai Txaranga auzoan barrena ibiliko da.
- 19:45: Omenaldia egingo diote Joaquin Azpillaga ‘Txintxo’-ri. Lintxua Dantza Taldekoek agurra dantzatuko diote.
- 20:00: Jaien hasiera alkate txikiekin. Jarraian, buruhandiak eta Pasaia Txarangako kideak ariko dira.
- 22:00: Puro Relajoren kontzertua. Jarraian, DJ Kabuxa.
Larunbata (hilak 25):
- 11:00: Toka txapelketa.
- 11:30: Patata tortilla txapelketa.
- 12:00: Kantujira auzoan barrena.
- 12:00: Muxikoak Meipin.
- 16:00: Mus txapelketa.
- 17:00: Haur jolasak, RK Gazte Elkartearen eskutik. Jarraian, askaria.
- 18:30: Herri danborrada Meipi Band Txarangarekin.
- 20:30: Burrunba elektrotxaranga.
- 23:00: DJ Naza.
Igandea (hilak 26):
- 11:30: Kalejira Itsas Mendiko txistulariekin.
- 13:00: Kostantzia Itsas Mendiko Bandaren kontzertu mexikarra.
- 14:30: Herri bazkaria, Komando Zuritoren laguntzarekin
- 16:30: Rifaren zozketa. Jarraian, bingoa.
- 18:00: Erromeria 3ttu taldearekin.
- 21:00: Jaien bukaerako traka botako dute.
