Bi eguneko txangoa, Itsastarrak Mendi Taldearekin
Larunbatetik igandera izango da asteburu honetako txangoa. Burgos aldera joango dira mendizaleak.
Itsastarrak Mendi Taldeak hurrengo irteeraren berri eman du: Burgosera joango dira asteburu honetan. Bi eguneko txangoa izango dela aurreratu dute, eta bazkideek 75 euro ordaindu beharko dituztela, eta ez bazkideek, berriz, 80.
Larunbat goizean (hilak 25) abiatuko dira mendizaleak Pasaiatik, 6:30ean Trintxerpeko kaitik, edo bestela, 6:40an Garbera merkataritza gunetik.
Larunbatean, orotara, 13,5 kilometroko bidea egingo dute Orbaneja del Castillo herritik abiatuta, 3 ordu eta erdiko txangoan, eta 380 metroko desnibelari egin beharko diote aurre. Espinosa de los Monteros aterpean pasako dute larunbateko gaua.
Igandean (hilak 26), berriz, bi ibilbide egiteko aukera izango da. Batetik, erdi mailako irteera egingo dute. Orbañanos herritik aterako dira, 9 kilometroko txangoari aurre egiteko. Hiru ordu ingurukoa izango dela aurreikusi du taldeak, eta 540 metroko desnibela izango duela.
Bestetik, luzea egiteko aukera ere izango da, Humion mendia (1.437 metrokoa) igoko dute hala nahi dutenek. 18,5 kilometrokoa izango da bigarren hau, 820 metroko desnibelarekin. 5 orduko txangoa izango dela aurreikusi dute taldekoek.
