Sinadurak jasotzeari uko egin dio Portuko Agintaritzak
Eskalerillaseko 12 familiak eta Oarsoaldeko Etxebizitza Sindikatu Sozialistako kideak portuko sarreran izan ziren atzo. Agintaritzak ez zituen azken hiletan bildutako 2.000 sinadurak jaso nahi izan.
Eskalerillaseko bizilagunak eta Oarsoaldeko Etxebizitza Sindikatu Sozialistako kideak portuan izan ziren atzo, hamarka lagun bildu zituzten portuko sarreran. Azken hiletan Eskalerillseko bloketik kaleratu nahi dituzten 12 familien alde bildutako 2.000 sinadura inguru entregatzen saiatu ziren atzo, baina agintaritzak horiek jasotzeari uko egin ziola jakinarazi dute. “Portuko Agintaritzak sinadurak ukatu ditu, baina guk borrokan jarraituko dugu entzun gaitzaten, eta 12 familia hauentzako bizitoki aterabide bat lortzeko”, esan zuten atzokoan.
Bide batez, ekainaren 1eko manifestaziora atxikitzeko deialdia luzatu zuten atzokoan. Larunbat horretan familia hauentzako “alternatiba erreala” exijitu dute, baita kalitatezko etxebizitza doakoa eta unibertsala ere. Zentzu horretan, etxegabetze guztien “suspentsioa” eskatuko dute manifestariek. 12:00etan abiatuko da mobilizazioa, Trintxerpeko Gudarien plazatik.
