Herriko txoko guztietan nahi dute euskara
Herrian euskararen presentzia handitu dadin proposamen ugari egin dituzte DBH 4. mailako ikasleek. Alkateak, zinegotziek eta teknikariek bertatik bertara ezagutu dituzte haien eskaerak eta identifikatutako gabeziak.
Pasaiako gazteak udaleko ordezkari izan dira egun batez. Zinegotzien eta alkatearen lekua hartu zuen joan den astean Karmengo Ama, Anunciata eta Pasaia-Lezo Lizeoko DBH 4. mailako ikasle talde batek. Euskarak Pasaian duen egoerarekin eta bereziki presentziarekin kezkati zirela jakinarazi zieten udal ordezkariei. Bilkura aberasgarria izan zen, hartu- eman emankorra.
Etxeko lanak ederki eginak zituzten bertaratu ziren ikasleek. Azken hiletan gogoetarako tartea izan dute klaseetan, lanketa handia egin dute. Zerrenda luze bat aurkeztu zieten, lanketa horretatik ateratako proposamenez betetakoa. Guztiak, asmo berberarekin: euskararen presentzia indartzea lau barrutietan. Ostalaritzan, merkataritzan, kultur eskaintzan, teknologian, kirolean… Esparru askotan ikusi dituzte gabeziak, eta guztietan eragiteko premiaz aritu ziren.
Hartu-eman zuzena du udalak herriko haur, nerabe eta gazteekin, Bokalen hauei begirako lan-mahai propioa baitu erakundeak. Lan-mahai horren eskari batetik dator ikastetxeek egindako lanketa eta aurreko asteko bilkura. «Gazteek euskara nola bizitzen duten jakin nahi dugu, zein gabezia ikusten dituzten herrian, zer nahiko luketen euskaraz izatea eta euskaraz bizitzeko zer beharko luketen ikertu nahi izan dugu», dio Laura Ré Euskara zinegotziak. Aipatu du saio honekin lehenengo fasea bukatutzat eman dutela, eta orain bigarrenari ekingo diotela. «Bigarren fasean ikastetxeetan erabiliko den material didaktikoa sortuko dugu, gazteek hizkuntzarekin dituzten bizipenak, portaerak eta kontzientzia lantzeko materiala. Aurkeztutako gabezia horiek guztiak nola hobetu daitezkeen ere landuko dute».
Jasotako proposamen batzuekin «harrituta» geratu direla aitortu du Rék, pozik. «Harritu nau eta poztu nau oraindik euskaraz ez dauden zerbitzu asko identifikatu dituztelako. Kontziente dira bizitzako esparru guztietan euskararen presentzia ez dela bermatzen, eta bermatu behar dela aldarrikatu dute, horretaz konturatu dira eta ikusten dute. Gogoeta handia egin dute gazteek, eta hori oso garrantzitsua iruditzen zait».
Eskaerak egitetik harago, gazteek ardura hartzeko hitza ere eman zuten, hori ere aldarrikatu zuten joan den asteko saioan. Haien kuadrilletan euskaraz aritzeko beharraz ere aritu ziren, eta guztiek aisialdi euskalduna nahi dutela argi geratu zen. «Kontzertuak euskaraz nahi dituzte, baita euskarazko proiekzioak ere. Eta gazteak izanik, doakoak nahi dituztela esan digute, adin tarte horretan behar hori dutelako».
Egun batez ikusle gisa aritu zirenek ikasleen proposamenak jaso zituzten. Teo Alberro alkateak hitz eman zien guztiak banan-banan aztertuko zituela, eta erantzuna emango zietela. Ikasleei ere gonbita luzatu zien gabeziei erantzuteko proposamenak elkarrekin lantzeko. «Orain lanean hastea tokatzen zaigu».
