Eskalerillasen Ekidako kide batzuk identifikatu dituztela salatu dute
Bertatik kaleratu nahi dituzten 12 familiei elkartasuna adierazteko murala egiten ari dira. Atzo zenbait ertzain bertaratu zirela salatu dute, Ekidako kideak identifikatuz.
Atzo (hilak 27) arratsaldean Ertzaintza Trintxerpeko Eskalerillas blokean bertaratu zen, bertan lanean ari ziren zenbait Ekidako zenbait kide identifikatuz. Hala salatu berri du Oarsoaldeko Etxebizitza Sindikatu Sozialistak sare sozialen bidez. Sindikatuko kideek esandakoaren arabera, Ertzaintzak jakinarazi zien Pasaiako Portuak salaketa bat jarri duela.
Ekida Arte Ekimen Sozialista arduratzen ari da murala margotzeaz. Bertatik kaleratu nahi dituzten bizilagunen borrokarekin “elkartasunez” ari dira lanean, bertan bizi diren familiekin zein Pasaiako eta inguruko zenbait pertsonekin. Joan den asteburuan hasi ziren murala margotzen, eta atzokoak ez dituela geldituko iragarri dute, eta beraz, gaur eta bihar kanpoko hormak apaintzen jarraituko dutela.
Ekida “artea politika sozialistaren arabera antolatzeko plataforma” da, “gaitasun artistikoak modu kolektiboan eta militantean antolatuta”. Hainbat diziplina lantzen dituzte: antzerkia, musika, literatura, bertsolaritza, muralismoa…
Bide batez, larunbat honetan (ekainak 1) etxegabetzearen kontra antolatutako manifestaziora deitu du Ekidak eta Etxebizitza Sindikatu Sozialistak. Trintxerpen egingo dute mobilizazioa, “alternatiba erreala” exijitu eta etxegabetze guztien “suspentsioa” exijituko dute. 12:00etan abiatuko dira manifestariak Gudarien plazatik. Pasaitar eta inguruko udalerrietako herritar oro gonbidatu dute mobilizazioan parte hartzera.
Lotura honetan Ekidaren X sare sozialera jo daiteke, salaketara.
