Nafar Pirinioetara irteera egingo du Xoxolurrek irailaren 21 eta 22an
32 plaza baino ez dira egongo ikasturteko lehen irteera horretarako, eta izena emateko azken eguna uztailaren 14a izango da.
Denboraldiko azken irteerarekin batera iragarri zuen Xoxolur Mendi Elkarteak datorren ikasturteko lehen irteera Nafar Pirinioetara egingo zutela, eta kartela iragarri berri dute.
Irailaren 21ean, larunbata, Sotxo taberna parean elkartuko dira txangora joango direnak, 8:30ean, eta handik Untzue herrira joango dira. Behin Untzuen, bost kilometro inguruko ibilbide zirkularra egingo dute, Alaitz mendilerroan aurkitzen den “gailur txiki bezain ikusgarria igoz”. Bazkaria Untzuen egingo dute, eta indarberritu ondoren bidaiarekin jarraituko dute.
Arratsaldean herriaz gozatzeko aukera izango dute, besteak beste, frontoian jolastuz edota Eska ibaian bainu bat hartuz.
Hurrengo egunean, gosaldu ondoren, autobusa hartu eta Erraitzeko Lepora joango dira hamabi kilometro inguruko mendi ibilaldia egiteko, Belaguako Aterpean amaituz. Ingurune horretan bazkalduko dute, eta bazkalostean egingo dute itzulera Lezora.
Xoxolurrek ohartarazi du aterpeak pentsio erdiko zerbitzua eskainiko duela: afaria, loa eta gosaria, alegia. Bestalde, adierazi dute larunbateko mendi irteerako motxilan norberak bere hamaiketakoa, ura eta mendirako arropa egokia eraman beharko dituela, eta, maletan, berriz, honakoak: aldatzeko arropa, lotarako zakua, norberaren garbiketarakoak, larunbateko bazkaria, igandeko mendirako hamaiketakoa eta bazkaria.
Izena emateko helbide honetara idatzi beharko da mezua partaide bakoitzaren izen abizenak eta adina zehaztuz, uztailaren 14a baino lehen. 32 plaza baino ez dira egongo, eta izen emate ordena errespetatuko dute. Helduek 45 euro ordaindu beharko dituzte; haur edo gazteek, aldiz, 40. Ordainketa irailean egingo da.
