Bertso musikatu solidarioa, minbiziaren estereotipoak gainditzeko
Hilaren 22rako 'Tabuen kutxatik oholtzara' izeneko bertso saio musikatua antolatu dute udalak eta Izan Inurri elkarteak. Umorearen bidez, minbiziaren atzean "mundu zabala" dagoela ikusaraztea du helburu, "esperientziak, ahotsak eta gorputzak plazaratuz".
Pasaiako Udalak eta Izan Inurri elkarteak bertso saio musikatu solidarioa antolatu dute datorren hilaren 22rako (igandea da). Pasai Donibaneko Juanba Berasategi aretoak jasoko du emanaldi berezia. Bertan, Tabuen kutxatik oholtzara izeneko emanaldiaz gozatzeko aukera izango da, “minbizia modu batera edo bestera jasatea tokatu zaienei laguntzeko eta gizartea sentsibilizatzeko” asmoa duena.
Izan ere, saio honetan bularreko minbiziari lotutako estereotipoak gainditzeko “ekarpen xumea” egingo dute, hainbat emakumeren testigantzen bidez, udaleko iturrien arabera, “esperientziak, ahotsak eta gorputzak plazaratuz eta umorea tresna moduan baliatuz”. Proiektu honek emakume bertsolarien parte hartzea bultzatu nahi du, eta kultur eragile gisa duten balioa aitortu nahi die. Finean, minbiziaren atzean “mundu zabala” dagoela ikusarazi nahi du elkarteak, “gaixotasunak inposatzen duen isiltasuna hautsiz, mamuak zokoratuz eta tabu diren gaiak azaleratuz”.
Lau emakume bertsolari igoko dira oholtzara: Alaia Martin, Ane Labaka, Onintza Enbeitia eta Uxue Alberdi. Amaia Agirrek egingo ditu gai jartzaile lanak, eta Gari Otamendi eta Ixak Arrutik musikatuko dute saioa. Inurri elkarteko emakumeak ere oholtzara igoko dira, gaiak jartzaile gisa ere aritzeko.
Emanaldirako sarrerak Izan Inurriren webgunean edota egunean bertan eros daitezke (ordubete lehenago). Lortutako diru guztia Izan Inurri elkarteak jasoko du.
Pasaitar guztiak animatu dituzte saioaz gozatzera, eta inork galdu ez dezan, motora zerbitzua izango da. Trintxerpetik 17:15ean aterako da eta San Pedrotik, berriz, 17:25ean.
