Urtea bukatu bitarte, kultur egitarau "oparoa" Pasaian
20tik gora ekitaldiz gozatu ahal izango dute pasaitarrek abendura bitarte. Lau barrutietan izango da zerekin gozatu.
Datorren abendura bitarte kulturaz gozatzeko hamaika aukera izango dira Pasaian. Urtea bukatu bitarteko kultur egitaraua aurkeztu dute gaur Aitor Brion Kultura eta ondareko zinegotziak, Beatriz Caballero Kultur teknikariak, Alazne Mendikute Jaietako teknikariak, Aitziber Zinkunegi liburutegietako arduradunak eta Gorka Miranda Pasaia Musikaleko zuzendariak. “Oparoa” izango dela aurreratu dute.
Zinegotziak hartu du hitza lehenik. Adierazi duenez, 20tik gora egitasmo bildu dituzte kultur programazioan: antzerkia, musika, literatura, dantza, filmak, erakusketak… Lau barrutietan denetik izango dela esan du.
Gaur aurkeztu duten egitarauari bihar (hilak 20) emango diote hasiera, Eutsi Ramon! antzerkiarekin. Egitarau horren barruan, datozen zenbat hitzordu nabarmendu dituzte: bihar (hilak 20) Antxoko Biteri plazan egingo duten Zinema Kalearen azken emanaldia, San Pedroko Mendi Jaiak, igandeko Tabuen Kutxatik Oholtzara izeneko bertso saio musikatu solidarioa edota Kontu Kantari egitasmoaren azken bi emanaldiak
Liburutegietan ere eskaintza zabala izango dela iragarri du Zinkunegik. Ipuin kontaketak, Irakurketa Kluba eta liburu aurkezpenak izango dira, besteak beste.
Ordainketa behar duten emanaldietako sarrerak Bibe plataforman izango dira salgai, baina leihatiletan ere erosteko aukera izango da. “Pasaitar guztiak kulturaz gozatzera” animatu ditu azkenik Brionek.
Hemen klik eginda, agenda osoa kontsulta daiteke.
Pasaiako Kultura mahaia
Gaurko aurkezpenari bukaera emateko, zinegotziak aipatu du Pasaiako Udala lanean ari dela jada Pasaiako Kultur mahai osatzeko. “Diziplina guztietako eragileen bilgunea izateko asmoarekin” hasi dira lanean. Bertan, beste gai askoren artean, Pasaiako Kultur Plan Estrategikoa (2025-2030) eztabaidatuko dute. Aurreikuspenen arabera, azaroan egingo dute lehen bilkura. Herriko eragileekin bilera erronda bat ere hasiko du udalak.
