"Pasaian ez dute lekurik indarkeriazko ekintza edo portaerek, datozen lekutik datozela ere"
Trintxerpen azken asteetan izandako gertakarien harira, adierazpen instituzionala kaleratu du Pasaiako Udalbatzak. "Kezka eta ezinegona" adierazi du erakundeak.
Trintxerpeko alkateordetza. Azken asteetan Trintxerpen izandako gertakarien harira, adierazpen instituzionala kaleratu du Pasaiako Udalak ordezkaritza duten talde guztien izenean. “Kezka eta ezinegona” adierazi du erakundeak “Trintxerpen azken egunotan ematen ari diren gertakari larriengatik”, esan dute. “Bizikidetza lehenbailehen berrezartzeko” konpromisoa erakutsi nahi izan dute adierazpen honetan.
Azken egunetan zenbait mobilizazio egin dituzte auzotarrek, tartean, aurreko astean izandako liskarra salatzeko. Azken hiletan lapurreta ugari izan direla salatzen aritu dira zenbait herritar sare sozialetatik, eta deialdi horiei erantzuten ari da barrutiko talde bat.
“Arazo larri hori lehenbailehen bideratzeko” lanean ari dela diote udaleko iturriek, “indarrean dagoen legediaren barruan eta horretarako ezarritako prozedurak eta epeak errespetatuz”. Pasaitarren ongizatea, segurtasuna eta pertsona ororen osotasun fisikoa bermatzea udalaren ardura nagusia dela ere esan dute. Udalbatzak, aho batez, eskura dituen baliabide eta tresna guztiak martxan jarri dituela erantsi dute, “normaltasuna lehenbailehen berrezartzeko, ziur baikaude hori dela pasaiatar guztien nahia”.
Joan den astelehenean “larrialdiko barne lan bati” ekin ziotela dio adierazpen honek. Alde batetik, udalaren prebentzio baliabideak indartu dituzte, “Ertzaintzarekin koordinatuta, arazo larriagorik egon ez dadin”; bestetik, Gizarte Ekintza Sailarekin, Udaltzaingoarekin eta Gatazkak Konpontzeko Taldearekin (GKT) koordinatutako lanketa hasi dute.
“Jakin badakigu bizilagunak ondoezik eta haserre daudela azken egunotan gertatukoengatik, eta horrek hainbat mobilizazio eta elkarretaratze ekarri dituela. Bizilagunen protestak erabat errespetagarriak diren arren, horiek beti lege esparrua errespetatuz egin daitezen dei egin nahi dugu. Pasaian ez dute lekurik indarkeriazko ekintza edo portaerek, datozen lekutik datozela ere”, esan dute azkenik.
Teo Alberro alkateak, X sare sozialean, honako mezua bidali die herritarrei: “Lasaitzeko deia egin nahi dut eta zenbaitzuk agertutako jarrera bortitzak alde batera uzteko eskaera.“
Adierazpen osoa hemen irakur daiteke.
