"Arrazismoaren eta faxismoaren kontrako" herri argazkia aterako dute bihar Donibanen
Trintxerpeko gertakarien harira zenbait herritarrek zabaldutako mezu arrazista eta xenofoboei aurre egitera deitu du talde antifaxista batek.
Santiago plazan aterako dute herri argazkia. Trintxerpen azkenaldian izaten ari diren liskarren harira, eta zenbait herritarrek zabaldutako mezu arrazista eta xenofoboen aurrean, antifaxista talde bat antolatzen hasi da. Irakurketa bat argitaratu du talde honek, eta besteak beste, azken egunetan segurtasun eza salatzeko herritar talde batek egindako mobilizazioak “herrian bizi diren atzerritarrak kanporatzeko asmoz” antolatu direla esan dute. Manifestarien mezuetan zantzu arrazista eta xenofoboak daudela diote, eta hainbat “gertakari larri” izan direla salatu dute: bizilagun talde bat gauean “jipoiak” emateko antolatu dela eta azken egunetan barrutitik “enkaputxatuak” ikusi direla “burdinezko barroteekin.
Trintxerpeko kaleetan “diskurtso faxista naturaltasunez zabaltzen” ari dela ohartarazi dute, eta horri kontra egitera deitu dute. Bihar (larunbata, hilak 19), Donibaneko Santiago plazan “faxismoaren eta arrazismoaren kontrako” argazkia ateratzera deitu dituzte herritarrak. 12:00etan jarri dute hitzordua.
