Pasaia Antifaxista: "Segurtasunaren izenean ezin dugu gure herriaren bizikidetza kolokan jarri"
Pasai Doninabeko Santiago plazan bildu dira herritarrak azken asteetako "mezu eta indarkeria faxistaren eta arrazistaren" kontra. Herri integratzailea izateko "norabide berri" baten alde egin dute.
Santiago plazan elkartu dira herri integratzailea eraikitzeko "norabide berri" baten alde. Herritarrek bultzatutako Pasaia Antifaxista taldeak deituta, elkarretaratzea egin dute gaur eguerdian Pasai Donibaneko Santiago plazan. Azken asteetan Trintxerpeko Araneder kalean bizi diren atzerritarrak kanporatzeko indarkeria faxista gogor gaitzetsi dute eta Pasaian “elkarbizitzarako deia” luzatu dute.
“Liskarrak, lapurretak edota mehatxuak” egitea egotzi dieten atzerritarrek “segurtasuna arriskuan” jartzen dutenaren diskurtsoa irauli nahi izan dute. Taldearen arabera, bizilagunek adierazitako segurtasun falta horren aurrean bizilagunek “poliziaren presentzia handitzea” eskatu badute ere, “argi” geratu da poliziaren presentziak eta atzerritarrekiko jazarpenak arazoa ez duela konponduko.
Aitzitik, indarkeria “intentsifikatu eta biolentatuko” duela agerian geratu dela adierazi du Pasaia Antifaxistak. “Mobilizazioak hasi zirenetik Pasaian jatorri magrebtarreko pertsonekiko errepresioa eman baita. Hori gutxi balitz, mobilizazio hauetan inpunitate osoz egon dira haien aurkako jipoiak ere” salatu dute.
Herrian gertatzen ari den egoera hau ez dela “egoera isolatua” azaldu dute eta gogoratu dute Donostian, Euskal Herrian eta Europan hedatzen ari den “diskurtso eta kultura arrazisten logika berdinaren” ildotik doazen mugimenduak direla. Kasu horietan guztietan “atzerritar guztien kontrako mezuak eta praktikak” zabaltzen ari dira taldearen esanetan.
Gogoratu dute migratzeko arrazoien artean “gerra, gosete edota mafietatik ihes egitea” daudela haien buruak salbatzeko helburuz. Euskal Herrira “bizitza hobe baten bila” datozela nabarmendu dute, baina, dena den, Euskal Herrira iristean “kontrakoa” jasotzen dutela deitoratu dute, hala nola, bazterketa, seinalamendua, diskriminazioa edota instituzioen aldetik jazarpena.
Euskal Herriko langile klasearen estratu egonkorrenak “atzerritarren lan indarraren debaluazioari eta bertako lurrak ustiatzeari esker” hemengo bizi kalitatea mantendu duela oroitu dute eta hau urteetan zehar gertatzen ari dela seinalatu dute, “ongizate estatuari bide emanez”, hain zuzen ere. “Orain urte luzetan bizi izan ditugun baldintzek sortu dituzten ondorioak gurera etorri edo gure etxe azpian ditugunean arazo bilakatzen dira” gaitzetsi dute.
Ondorio horiek jazotzen direnean erantzuleak seinalatu beharrean atzerritarrak salatzen direla egoeraren erantzule moduan deitoratu du Pasaia Antifaxistak. Bien bitartean, Afrika, Latinoamerika eta Asiako herrialdeak esplotatzen ari dira batzuk “mendebaldeko gutxi batzuen kapital metaketari eusteko” eta haiek jo dituzte migratu behar izan dutenen jatorrizko herrialdeko “etengabeko miseriaren” erantzuletzat. “Orain krisiak sortzen dituen lehenengo ondorioak ikusten ari gara eta jendarteak ondorio horien erantzuleak seinalatu ordez miseria eta heriotzatik ihes egiten dutenak seinalatzen ditugu”.
Irakurketaren bukaeran herrian elkarbizitzarako deia luzatu dute eta hedabideen bitartez zabaldu diren “mezu faxistak eta arrazistak” Pasaiara iritsi direla ohartarazi dute. “Segurtasunaren izenean ezin dugu gure herriaren bizikidetza kolokan jarri eta gertatzen ari den indarkeria oldarraldi honek horixe egin du” salatu dute. Pasaia “herri integratzailea” izatea nahi dutenei zuzendu da Pasaia Antifaxista eta “norabide berri bat” hartzeko proposamena egin dute, diskurtso eta jarrera faxistak eta arrazistak ez onartzeko.
