Gatazka konpontzeko "bide baketsuak" bilatzera deitu dute zenbait eragilek
Trintxerpe eta San Pedroko 13 eragilek adierazpen bat sinatu eta kaleratu berri dute, azken asteetan izaten ari diren gertakarien harira.
Azken aste hauetan Trintxerpen izaten ari diren gertakarien harira, barrutiko zein San Pedroko zenbait eragilek adierazpen bat adostu eta kaleratu dute. Ur Gaiñ, Trintxer Elkartea, Ekaitza Gazte Taldea, CD Trintxerpe, Trintxerpeko Jubilatuak, Sanpedrotarra FE, Indarbizi 17, Trintxer Kulturala, Illunbe Arraun Elkartea, Trintxerpeko Korkoiburuak eta Fama eragileek sinatu dute.
Lehenik eta behin, “gure herriko bizilagunek jasandako indarkeriazko ekintzak erabat gaitzetsi” dituzte sinatzaileek. “Pertsona batzuek hainbat lapurreta edo mehatxu egin dizkiete zenbait bizilaguni, eta gure elkartasuna eta laguntza helarazi nahi diegu horiek pairatu dituztenei”, esan dute. Egoera hauen aurrean “sortu diren ekintza baketsuei gure babesa” adierazi diete, baina bukatzeko, “orotariko indarkeriazko jarduerak” gaitzetsi dituzte, eta honakoa salatu dute: “zenbait norbanakok, gure herriaren gehiengoaren borondate ona aitzakiatzat hartuta, justizia beren eskutik hartu nahi dute, eta erasoak, mehatxuak eta gorroto mezuak eragin nahi dituzte, gatazka honetatik kanpoko pertsonei ere eragin dietenak”.
Edonolako indarkeriazko jokabiderik ez dutela onartuko esan dute azkenik, “horiek ez ditugula Trintxerpen, San Pedron eta beste inon nahi”, eta “bide baketsuak gatazka konpontzeko bitarteko gisa” erabiltzeko deia egin diete herrikideei.
