Berdintasun kontseilua, urratsak egiten
Berdintasun kontseilua sortzeko prozesua martxan du Lezok. Aste honetan egin dute lehen bilera Kultur Aretoan, eta hurrengoa 2025eko urtarrilaren 22rako programatu dute.
Berdintasun kontseilua sortzeko prozesua martxan du Lezok. Aste honetan egin dute lehen bilera Kultur Aretoan, eta hurrengoa 2025eko urtarrilaren 22rako programatu dute. Orotara, 17 lagun bildu ziren, Gaxuxa, Lezdi, Etxetxo, Allerru, Piztu Lezo, Ttakun eta Lezoko Emakume taldeko kideak bertan zirelarik. Eneritz Arruti Osanbela eta Mireia Kuesta Unzain Lezoko Berdintasun zinegotziak eta Itsaso Cruz Etxeberria Errenteriako Berdintasun zinegotzia eta bertako Berdintasun kontseiluko kide bat ere bilkuran izan ziren.
Errenteria-Oreretako kideak Lezon izatearen arrazoia da bertako Berdintasun kontseilua Gipuzkoan aitzindaria dela, eta osatu duten ibilbideaz jardun ziren lezoarrekin. Errenteriarrek haien kontseiluaren nondik-norakoak azaldu zituzten Kultur Aretoan: osaera, lehentasunak, erronkak, egitekoak, helburuak, berdintasun planaren garapena bermatzeko proposamenak egitea eta oro har udal politiketan jardutea.
Errenteriako Berdintasun kontseiluak 15 urte inguruko ibilbidea osatu du, eta denbora horretan izandako lorpen nagusiak ere aipatu zituzten: Berdintasun Saila abiatzea, hori indartzea eta egonkortzea eta bere beharretara egokitutako aurrekontua finkatzea; Eskola Feminista eta Emakumeen Etxea sortzea; eta III. Berdintasun Plana onartzea. Berdintasun Plana, gainera, “oso landua” eta “anbiziotsua” dela zehaztu zuten errenteriarrek.
Betetako beste helburu batzuk ere hizpide izan zituzten oreretarrek: “Emakumeen ahalduntzea, emakume taldeen eta talde feministen aitortza eta euren inplikazioa eta saretzea eta politika egiteko moduen eraldaketa gobernantza partekatuaren alde egiteko, non emakumeen ahotsak entzutea eta euren parte hartzea ezinbestekoak diren”. Horrez gain, errenteriarrek kontseilua sortzeko prozesuaren “garrantzia” nabarmendu zuten, bi urtez luzatu eta kanpoko profesionalek dinamizatutakoa izan zena.
Bigarren bilkura urtarrilaren 22an izango da, eta bertan Lezon egitekoa den organoaren nondik-norakoak eztabaidatuko dituzte: helburuak, osaera, konpromisoak, sartzeko moduak, lehentasunak edota prozesuaren diseinua, beti ere duela urte batzuk adostutako dokumentutik abiatuta.
