Durangoko Azokan izango da Kazabon
'Ez dakit zergatik', 'Nire musika kutxa', 'Amestoki goxoa' eta 'Lainozko krema' liburuak argitaratu ditu, eta Durangoko Azokan izango da horiek aurkezten.
Antton Kazabonek Ez dakit zergatik, Nire musika kutxa, Amestoki goxoa eta Lainozko krema liburuak argitaratu ditu azken boladan, eta Durangoko Azoka entzutetsuan izango da horiek aurkezten. Amestoki goxoa Leire Iparragirreren laguntzarekin egin du; Nire musika kutxa Paul Caballerorenarekin, eta Lainozko krema eta Ez dakit zergatik liburuetan Jokin Mitxelena izan du bidelagun ilustrazioetan.
Bihar (larunbata) Saguganbaran izango da Kazabon 15:00etatik 16:00etara, eta liburuak aurkeztuko ditu bertan. Saioetan Jokin Mitxelena eta Leire Iparragirre ere izango dira, eta Kazabonek liburuak irakurtzen dituen bitartean marraztu egingo dute beste biek, zuzenean.
Bertsoa, baserria eta irakaskuntza
Literatura idatzian ahozkotik asko dagoela dio Kazabonek, eta, beraz, bertsoaren munduan izandako ibilbide oparoa lagungarri zaio oiartzuarrari idazteko garaian. Baserritik dator oiartzuarra, eta hor ere identifikatu du abantaila bat. “Naturako elementu guztiak ezagutzen ditut: animalia, landare, giro, eguraldi… Horrek ere testuak janzten asko laguntzen dit”. Irakasle izan da Kazabon 40 urtez; haren ustez, hori ere onuragarri zaio. “Gaztetxoentzat fikzioak errealitate gehiago behar du. 40 urtez izan naiz irakasle, eta honezkero gaztetxoen azpijoko eta saltsa guztiak ezagutzen ditut”.
Orri zuri baten aurrean jarri, eta zein gai landu eta zein ez pentsatu gabe hasten da idazten; folio bat lehenengo, bigarrena gero… “Istorioak nola jarraituko duen ez jakiteak eta pentsatzenjartzeak gero nola jarraituko duen kontakizunak morboa sortzen dit, nik ere ez dakidalako istorioa nola bukatuko den”.
Liburuak Erein, Ikas edo Denonartean argitaletxeekin harremana eginda eskura daitezke, baita Elkar argitaletxeko dendetan ere.
