Lau barrutiak, San Tomas egunerako irrikaz
Astebete lehenago hasiko dira Eguberriak Pasaian. Larunbatean San Pedron eta Antxon izango da festa; igandean, berriz, Donibane eta Trintxerpen.
Txistor usaina eta festa nagusi izango dira asteburu honetan Pasaian, lau barrutietan gainera. Ohi bezala, astebetez aurreratuko dituzte San Tomas egunarekin lotutako festak pasaitarrek. Lau barrutietako eragileek Pasaiako txoko guztietara zabalduko dute Eguberriei ongi etorria emateko ospakizuna. Sanpedrotarrek eta antxotarrek larunbatean ospatuko dute San Tomas eguna, eta sanjuandarrek eta trintxerpetarrek, berriz, igandean.
Lau barrutietako jai batzorde eta eragileek kalera baserritarrez jantzita jaisteko deia egin diete pasaitarrei.
Honakoa da barruti bakoitzeko egitaraua:
- Larunbata (hilak 14):
- San Pedro: Jai Batzordeak antolatuta, 12:00etan Ikastolako haurren kantaldia egingo dute pilotalekuan. Jarraian, txistorra postu bat jarriko dute bertan, pintxo eta taloekin.
- Antxo: Gure Zumardian urteroko azoka egingo dute, 10:00etatik 15:00etara. 12 postu inguru izango direla aurreratu du Antxoko Jai Batzordeak. Ordua zehaztu ez badute ere, Lizeoko haurren kantaldia izango dela iragarri dute. Eguerdian Antxoko Topaguneak antolatuta, bazkaria egingo dute jubilatuen egoitzan.
- Igandea (hilak 15):
- Donibane: Itsas Mendi elkarteak antolatuta, azoka egingo dute Santiago plazan 11:00etatik 15:00etara. 12:00etan Lizeoko ikasleen eta Konstantzia bandaren emanaldia izango da. Jarraian, Lintxua dantza taldeak emanaldia eskainiko du.
- Trintxerpe: Goizean zehar txistor postuak izango dira hiru gunetan. Ekaitza gazte taldearena Azkuene parkean egongo da, Boveda gazte taldearena merkatuaren aurrean eta Illunbe arraun elkartearena Serafin Esnaola plazan.
