'Panpin Orkestra', Hatxeren lehen orkestra lana
Idoia Hernandez 'Hatxe' eta Errenteriako Herri Arte Eskolako orkestrak 'Panpin Orkestra' diskoa aurkeztu dute. Lekuona Fabrikan grabatutako hiru abestik osatzen dute diskoa.
Idoia Hernandez Hatxe eta Errenteriako Herri Eskolako orkestrak Panpin Orkestra diskoa aurkeztu dute gaur, hilaren 13an, Herri Arte Eskolan bertan. Hatxerekin batera, bertan izan dira Herri Arte Eskolako lehendakari Aitor Zorzano, Sergio Zapirain bertako orkestrako zuzendaria, Beñat Ralla eskolako kidea, eta Eresbileko zuzendari Pello Leiñena
Lehen aldia zuen konpositoreak orkestrarako konposizioak sortzen, eta Herri Arte Eskolako ikasleek Musikasten estreinatu zituzten Panpin Orkestra kontzertuaren bidez. Jasotako harrera onagatik “oso eskertua”, konposizioetako hiru diskora eramatea erabaki zuen: Nola-ez-ERO-tu eta BASO-an-barro orkestraren egokitzapenak, eta TQM puta, proiekturako bereziki sortutako kantua.
Sergio Zapirainek zuzendurik eta Mukuru musika sortzaileen elkarguneak ekoizturik, Hatxe piano jolearekin batera, Peru Galbete, ahotsa; Jurdana Otxoa, biolin soloa; Itsaso Etxebeste, baxu elektrikoa; Herri Arte Eskolako orkestrako hari-talde eta eskolako haize instrumentuen taldeko kide batzuk osatu dute proiektuko musikari taldea. Lekuona Fabrika “estudio bilakatu” eta hor grabatu zituzten orkestrarekin landutako bost kantuak.
Proiektu honek Hatxe konpositorea eta eskolako ikasleen harremana sustatu eta errepertorioa elkarrekin osatzea ahalbidetu du. Ikasleek orkestra lanaren sorkuntza prozesuak dituen ertz guztiak ezagutzeko aukera izan dute, “konposizio eta moldaketa fasetik, grabaketa eta interpretaziora”, eta “konplizitate handiarekin” burutu dute lan osoa. Gainera, zuzendariarentzat ere ikaskuntza izan daitekeela zehaztu dute, sortu berriak diren konposizioak orkestrara eraman baititu.
