Sanmarkoseneko langileak aldundian mobilizatu dira
Kaleratzeak ekidin eta %100eko lan kontratuak eskatzeko elkarretaratzea egin dute Sanmarkoseneko langileek. 22. greba eguna dute.
Azaroaren 18az geroztik gaurkoa 22. greba eguna dute Sanmarkosene egoitzako langileek ELA, LAB eta ESK sindikatuek deituta. Gureak enpresak kudeatzen du egoitza, eta enpresak proposatutako lan baldintzen aldaketei aurre egiteko bost kaleratzeak ekidin eta %100eko lan kontratuak egitea eskatzen ari dira. Gureak-ek kudeatzen badu ere, Gipuzkoako Foru Aldundiak finantzatzen du zerbitzuaren %96a, hortaz, langileek aldundiari “ardura hartzeko eta lan jardunaldi osoa izango duten langile kopuru egokia bermatzeko” eskatu diote.
Izan ere, pertsonal faltak langileentzako lan karga handiegia eragiteaz gain, egoiliarrek jasotzen duten zerbitzua ere kaltetzen du, familiarteko eta sindikatuen arabera. Langile faltagatik egoitzako ordutegiak atzeratzen dira, eta laguntzaile bat falta den egunetan gertatu izan da ordutegian atzerapenagatik egoiliarrak paseatzeko aukerarik gabe gelditzea, eta ohean 13 edo 14 ordu egotera iritsi daitezke, paseoak medikuak agindutakoak izan arren. Gainera, urte osoan zehar gosariak atzeratzen dira, eta laguntzaile falta dagoen egunetan gosaria eta bazkaria bi ordu baino gutxiagoko tartean izatea gerta daitekeela jakinarazi dute.
Finkatutako helburuak lortu arte borrokan jarraituko dute langileek, eta dei egiten diete euren ondoan dauzkaten familiarteko, pentsiodun elkarte eta bestelako eragile sozialei mobilizazioetan parte hartzen jarraitzera.
