Pasaiako PSE-EE: "Topoaren zubibidearen eraisketa Antxo biziberritzeko giltza da"
Sozialisten arabera haiek izan dira egitasmoari bultzada eman diotenak. "Antxotarren eskaera historikoari erantzuna eman zaio", esan dute.
Joan den astean Eusko Jaurlaritzak iragarri zuen Antxoko toporaren zubibidea eraisteko lanen prozesua abiatu duela Eusko Trenbide Sarearen (ETS) bitartez, lizitazio fasean delako horren idazketa. Udalak horren gaineko iritzia eman zuen. Herriko PSE-EEk ere badu gaiaz zer esan: “Zubibidearen eraisketa Antxo biziberritzeko giltza da”. Hala, egitasmoari bultzada eman diotenak haiek izan direla azaldu dute sozialistek: “Pozik gaude, beste behin sozialisten konpromisoari esker gure udalerria biziberritzeko bidean urratsak egiten ari direlako. Iñaki Arriolak eta Izaskun Gomezek bere garaian hartu zuten konpromisoa beteko da orain, Susana Garcia Chueca Jaurlaritzako Mugikortasun Jasangarriko sailburuaren bitartez”. Arriolaren nahiz Gomezen konpromisoa 2022tik datorrela adierazi du Lore Suarez PSE-EEren udal taldearen eledunak.
Suarezek gogorarazi du antxotarren eskaera “historikoa” dela zubibidearen eraisketa, “horrela, barrutia birgaitzeko aro berri bat hasiko da”. Antxo bitan zatitzen du egungo topoaren bidea, “hesi fisikoa” haientzat. Hala, behin topoaren geltoki berria egin eta zubibidea eraisten denean pasaitarren bizitza kalitatean nabarmen hobetuko dela baietsi dute PSE-EEkoek, “Antxorentzat mugarri izango da, eta herritarrek espazioak irabaziko dituzte euren bizitza hobea izan dadin”.
Gobernu Taldeari ere eskaera egin diote sozialistek. “Bada garaia gobernu taldeak Antxo berria definitzeko, ez dezala bakarrik Gure Zumardiaren gaineko lanketarik egin. Lanean jartzea tokatzen zaie, eta zubibideak libre utziko dituen lur eremuetan zer egin pentsatzen hasi”.
