'Indarkeriaren oi(h)artzunak' lanak zilarrezko Biznaga lortu du Malagan
Ander Iriarte oiartzuarrak eta Amaia Merinok zuzendu dute dokumentala, eta 'Emakumeak eszenan' saileko dokumental onenaren saria irabazi dute.
Hilaren 14tik 23ra ari dira ospatzen Malagako Zinema Jaialdia, eta bertan da Ander Iriarte oiartzuarra bi lanekin: Indarkeriaren oi(h)artzunak eta Judoka. Berriki, gainera, jakinarazi dute Indarkeariaren Oi(h)artzunak proiektuak zilarrezko Biznaga bat lortu duela jaialdian.
Iriarte eta Amaia Merinok zuzendu dute lana, eta torturaren auzia azaleratu dute bertan. “Hamar urte baino gehiago daramatzagu Amaiak eta biok torturaren auzia zinemara eramaten, sari dezente ditugu, eta gure hirugarren filmaren jaialdia Biznagarekin amaitzea ikaragarria da. Ikaragarria da ez bakarrik saria handia delako, baizik eta Espainiako beste puntatik lortu dugulako biktimei esatea ‘sinesten zaituztegu’, kontatu du oiartzuarrak.
Emakumeak eszenan saileko dokumental onenaren saria irabazi dute Iriartek eta Merinok, eta horren harira badu zer esana Oiartzuarrak. “Azken urteetan feminismoak zerbait erakutsi baldin badigu da norbait ausartzen bada barrenak hustu eta pasatu duen miseria hori kontatzera, gizarte bezala gure betebeharra dela berari entzun eta ‘sinesten zaitut’ esatea”.
Ildo horretatik, Iriarterentzat “garaipen bat” da saria. “Uste dut Euskal Herria eta egia zein erreparaziorantz ere badela beste urrats bat, beraz, izugarri pozik gaude”, jarraitu du.
Iriartek aitortu du, bestalde, ez zutela espero Malagan “horrelako gai batekin” jendea hunkitzea, “baina Tamarak lortu du”, dio. Karpeta Urdinak lanarekin ere irabazi zuten saria, eta hausnaketarako bidea ireki dio horrek. “Torturaren auzian jaialdi moduan irabazi ditugun bi sari garrantzitsuenak nazioarteko sariak izan dira: Madrilen bata eta Malagan bestea”.
Iriarterentzat sari honek balio immateriala dauka; hots, “errekonozimendua ematen du batez ere”. Zinemagileen munduan “oso garrantzitsua” dela hori azaldu du zuzendariak, horrelako sariek ahalbidetzen baitute hurrengo proiektuekin aurrera egitea. “Biznaga honek oihartzuna eman dakiguke esateko ‘ondo ari gara egiten, eta beste proiektu bati heltzeko prest gaude””, dio.
Ildo horretatik, Iriartek aipatu du torturaren auziari deskantsu apur bat emango diotela, eta orain euskararen auzian sartuko direla.
“Espero dugu Biznaga honek gizartean eta instituzioen aurrean guri legitimazioa ematea gai honen inguruan hitz egiteko “, amaitu du.
