Teo Alberro: "Datozen egunotan ondorioen balorazioa egingo dugu"
Pasaiako udalak adierazi duenez, 14 hektarea baino gehiago erre dira Jaizkibelgo sutearen ondorioz. Kalte eta ondorio zehatzak datozen egunetan aztertuko dituzte.
Martxoaren 20an Jaizkibel mendiaren magalean sortu zen sutea erabat itzaltzea lortu dute suhiltzaileek. Suteak bi mingain izan zituen: Hondarribia aldera joan zena eta 17:30etan kontrolatu zena, eta Donibanekoa, gauez eremutu zena. Bi fokuak kontrolpean izan ondoren erabat itzali zituzten suhiltzaileek. Pasaiako udalak azalpenak eman ditu martxan jarri zuten protokoloaren inguruan: “baso-suteak daudenean, SOS Deiak-ek koordinatzen du hasierako deialdia, eta hala egin zuen pasa den hilaren 20an ere, Ertzaintzari eta Udaltzaingoari abisatuz. Hortaz, Bidasoako eta Tolosako parkeetako suhiltzaileak joan ziren sua itzaltzera. Abisua jaso bezain laster, Pasaiako Udaltzaingoa, Ertzaintza, Babes Zibila eta suteen aurkako helikopteroa ere bertaratu ziren. Lurrez eta airez lanean izan ziren larrialdi zerbitzuak”. Helikopteroak segundo bakarrean mila litro ur isuri ditzakeela eta dozenaka joan-etorri egin zituela azpimarratu dute, ura Pasaiako badiatik hartzen baitzuen.
Erre den lursail kopuruari dagokionez, oraindik ez dago kalkulu zehatz eta ofizialik, baina 14 hektarea baino gehiago erre direla uste da. Alberro alkateak egin dituen adierazpenen arabera, azken bi urtetako suterik larriena izan da honakoa: “Atzo gure herrian piztutako suteak kalte nabarmena eragin du gure ingurune naturalean. Azken bi urtetako suterik larriena izan dela aipatu digute. Zorionez, ordea, eta lehen unetik gunean lanean ibili ziren larrialdietako profesionalei esker, ez da inor zauritu. Datozen egunotan ondorioen balorazioa egingo dugu”.
