San Joan kaleko jaia: 'aurten baitare!'
Hilaren 21ean izango da San Joan kaleko jaia. Hala ere, aurreko egunetarako zenbait ekintza antolatu dituzte.
1972tik San Joan kaleko jaia ospatu gabe egon ondoren, iaz, mende erdi geroago berreskuratu zituzten bizilagunek euren karrikako jaiak, eta, iazkoak izan zuen arrakasta ikusita, kaleko batzordeak iragarri du aurten ere ospatuko dutela jaia Aurten baitare! lelopean.
Egun bakarreko jaia izango da, eta data seinalatua hilaren 21a –larunbata– bada ere, aurreko hiru egunetarako zenbait jarduera antolatu dituztela aurreratu dute batzordeko kideek.
Lehen hitzordua, beraz, hilaren 18an –asteazkena– izango da, eta, zehazki, egun horretan zineforuma egingo dute pleno aretoan. La reina del Chantecler filma ikusiko dute, herrian bertan grabatua baita. Filma amaitutakoan, modakua egingo dute bertaratu direnek kaletarren oroitzapenak partekatzeko.
Hurrengo egunean, hilaren 19an alegia, San Joan kaperara bisita gidatua egingo du Elena Zalakainek, 18:30ean hasita.
Eta, jaiaren aurreko azken jarduera hilaren 20an izango da; egun horretan, 17:00etatik 19:00etara, Neuk dendan kaleko txikienek “kaletar historikoak” ezagutzeko aukera izango dute. Horretarako prestatu dute, hain zuzen, ebakigarriak eta txapak egiteko tailerra. Jakinarazi dutenez, txokolatada ere izango da tartean.
San Joan jaia
Hilak 21, larunbata
- 10:00. Diana Oidultz dultzaina taldearen eskutik.
- 11:00. Zinta karrera eta toka.
- 12:00. Nesken pilota erakustaldia Kontzejupean.
- 13:00. Kaleko omenduaren ekitaldia. Jarraian, ‘bermuta kantuz!’.
- 14:30. Kale bazkaria.
- 16:30. Karolinen zozketa. 30 sari eskuratzeko aukera.
- 17:00. Kontzertuak: June Galardi, Mk-33 eta Zurrounk.
