Bero boladei aurre egiteko hemeretzi babesleku prestatu ditu Udalak
Babeslekuak herritarrei aurkezteko lau parte hartze saio egin ondotik, beste lau antolatu dituzte hurrengo egunetarako. Hemeretzi babeslekuetatik zortzi udal eraikinetan daude eta bederatzi kanpoan kokatuak.
Klima aldaketa dela eta, babesleku klimatikoak prestatzeari ekin zion Pasaiako Udalak 2023an, Klima eta Energiaren Tokiko Planeko 5.2.1 ekintza onartuz. Herritar zaurgarrienen osasuna bero boladengandik babesteko tresna dira.
Behin plana onartuta, 2024an herritarren babesleku izan litezkeen kanpoko eta barruko espazioak aztertzen hasi zen. Hala, hemeretzi babesleku egongo dira hurrengo bero boladetan, zortzi udal eraikinetan eta bederatzi kanpoan kokatua. “Horiek guztiek irisgarritasun baldintzak betetzen dituzte, edateko ura eskura dute eta baita atseden hartzeko eremua ere”.
Herritarren sektore batzuekin (hezkuntza komunitatea, emakumeak eta hirugarren adinekoak) lau parte hartze saio egin dituzte martxotik apirilera. Hurrengo egunetarako beste lau saio antolatu dituzte, hilaren 11, 12, 17 eta 19an, hain zuzen ere. Herritar guztiei zabaldu diete gonbidapena.
Gainera, hemeretzi babeslekuez gain, “herriko azpiegitura berdea handitzeko borondatea” ere badutela argitu dute, eta horretarako “azterketa lanean dihardute barruti guztietan”, Iraitz Pazos Ingurumen zinegotziaren arabera.
Hurrengo egunetako saioak
- Hilaren 11n, 18:00etan, San Pedroko Udal Aretoan
- Hilaren 12an, 18:00etan, Donibaneko Juanba Berasategin
- Hilaren 17an, 18:00etan, Antxoko Molinao parkean (eguraldi txarra egingo balu Musika Eskola barruan).
- Hilaren 19an, 18:00etan, Trintxerpeko Musika Eskolako parkean (eguraldi txarra egingo balu Musika Eskola barruan).
