II. Antxin Ezkerro Memoriala igandean hasiko da
Txost pilota elkarteak II. Antxin Ezkerro Memoriala antolatu du, eta bi asteburutan banatu dituzte jardunaldiak; igandean –hilak 15– izango dira lehen partidak.
Txost pilota elkarteak II. Antxin Ezkerro Memoriala antolatu du, eta bi asteburutan banatu dituzte jardunaldiak; igandean –hilak 15– izango dira lehen partidak, eta final erdiak zein finala hilaren 22an izango dira. Memorialean gizonezkoen senior mailako pala motza, neska seniorren paleta larruzkoa eta 18 urtez azpikoen paleta larruzko txapelketak jokatuko dituzte.
Partida guztiak Madalensoro eta Haurtzaro pilotalekuan jokatuko dituzte, goizeko bederatzietatik arratsaldeko zazpiak arte, eta bertan Bizkaia, Nafarroa, Errioxa, Iparralde, Landak, Bearno eta Gipuzkoako pilotariak ariko dira.
18 urtez azpikoen txapelketa, hilaren 15ean izango dena, lau taldetan banatuko dute, eta talde bakoitzeko lehen sailkatua finalerdietara sailkatuko da. 20 minutuko partidak izango dira, eta tanto kopuruan berdinketa egonez gero, partida irabaziak kontatuko dira. Haatik, partida irabazietan ere berdinketa egonez gero, gazteena pasako da bigarren fasera. Haurtzaron jokatuko dituzte ligaxkako partidak.
Hilaren 22 goizeko partidak ere Haurtzaron izango dira, eta talde bakoitzeko aurreko asteko lehen sailkatuen arteko ligaxka izango da. 20 tantotara izango dira partidak, eta partida gehien irabazitako bi pilotariak pasako dira. Berdinketak egonez gero beraien arteko partiden emaitza hartuko dute kontuan. Finala, aldiz, Madalensoron izango da, 25 tantotara, arratsaldeko lauetan hasita.
Emakume seniorren kasuan, aldiz, igande arratsaldean jokatuko dituzte lehen partidak, eta hilaren 22 goizean finalerdiak eta arratsaldean finalak jokatuko dituzte. Madalensoron izango dira partida guztiak.
Azkenik, gizonezko seniorren txapelketari dagokionez, Madalensoron izango dira partidak, goizeko hamarretan hasita. Partiden irabazleen arratsaldean jokatuko dituzte final laurdenak, eta partida guztiak 25 tantotara izango dira.
Partida zein taldeen inguruko informazio gehiagorako, egin klik hemen.
