Oiartzungo Poesia Egunak bueltan dira
Aurten irailaren 5etik 11ra izango dira Oiartzungo Poesia Egunak. Urtero bezala ibilbide poetikoa antolatu dute, herriko zein kanpoko poetekin eta irakurleekin.
Aurten ere poesiak protagonismo berezia izango du uda amaieran. Kultur eskaintzaren inguruko kezkatik abiatuta sortu zuten Oiartzungo zenbait kultur eragilek poesia ardatz duen Oiartzungo Poesia Egunak egitasmoa.
Sortu zenetik -2020tik- eraldatzen joan den egitasmoa da. Izan ere, hasierako urteetan egun bakarreko jardunaldia izaten zen soilik. Iaz hiru egunekoa antolatu zuten eta aurten astebetera luzatzeko apustua egin dute: irailaren 5etik 11ra izango da.
Urtero bezala aurtengo egitarauaren puntu gorena ibilbide poetikoa izango da. Ergoiengo bidegorrian barrena hiru errezitaldi egingo dituzte herriko zein kanpoko poeta eta irakurleekin. Ibilbidea amaitzerakoan bazkari eder batez gozatuko dute. Antolatzaileek jakinarazi dutenez irakurle izan nahi dutenek hurrengo helbidera mezu bat bidali beharko dute hilaren 16a baino lehen.
