Antxotarrek tripa bapo beteta ekin diete sanferminei
Txupina atzo arratsaldean bota ostean, adin guztietako herritarrentzako egitarauaz gozatu dute gaur antxotarrek. Batzuek arrantza txapelketan igaro dute goiza, besteek erraldoi eta buruhandien inguruan, eta azken batzuek marianitada girotuan. Hortik, denak Biteriko karpako bazkarira joan dira.
Giroa berotzeko lehenagotik zenbait jarduera antolatu baldin badituzte ere, atzo arratsaldean bota zuten Antxon txupina. Gaur, jai giroan erabat murgilduta, festen hasiera behar bezala ospatzen hasteko egitarauetan parte hartu dute haur, gazte zein helduek.
Galeperterrak elkarteak alaitu du gaztetxoenen goiza. 0 eta 16 urte artekoentzako arrantza txapelketa antolatu du ibaian, eta haur eta gazte ugari gerturatu dira hiru orduan zenbat arrain arrantzatzeko gai ziren ikustera. Arrain handiak arrantzatzea lortu dute batzuek; beste batzuek, txikiagoak; eta bada arrainik arrantzatzea lortu ez duenik ere. Hala ere, parte hartzaile guztiei eman dizkiete domina eta goxokiak, irabazleen sari banaketa egin aurretik.
Ibaitik urrutiago, jai giroa pizten hasia zen dagoeneko. 12:00etan Antxoren itzulia egin dute buruhandi, erraldoi eta musikariek, eta horren ondoren, marianitada girotura gerturatu dira herritarrak txosnaren karpako itzalpera. Marianitoz-marianito, bazkaltzeko ordua iritsi zaie festazaleei, eta Biteriko karpara gerturatu dira tripak betetzera.
Bazkalostean ere egongo da zer egin. Ondo liseritzeko, mus txapelketak irekiko du arratsaldeko egitaraua, eta honen atzetik etorriko dira tortilla txapelketa, bertso saioa, edota Arkale, Eztanda eta Brigade Locoren kontzertuak, besteak beste. Hilaren 8ra arte iraungo dute jaiek, eta Udalaren webgunean dago eskuragarri egitarau osoa.
Sanferminetan izan da HITZA, eta zenbait argazki egin ditu.
